4月15日 (星期五) 天晴
難得今個假期在4月尾至5月初, 原本已安排好去日本賞花, 主打唔係櫻花而係富士芝櫻同枥木的紫藤花, 但一場9級東北大地震, 痛心地, 無奈地取消行程 
好遲先決定改去新加坡, 原本的日期當然無咩機位啦, 又唔想旺季去迫, 所以唯有只此一次同小朋友請假去旅行
話咁快就出發.... 
第一個"哈日症"發作係我, 當見到架飛機向下飛唔係向上的日本飛時, 心情非常失落, 而且去新加坡的飛機幾舊, 娛樂方面唔太得, 個位又唔舒服, 瞓吓又食吓便算, 這4小時好似過得好慢咁....
準時晚上7點多到達樟宜機場, 大少同大小姐去取行李, 二小姐坐在一旁發"牛豆"。 大小姐自覺已長大, 唔肯要妹妹手上國泰送給小朋友的禮物 
最簡單, 快捷去酒店的方法 - 坐的士......上到的士發覺妹妹不作聲有點奇怪望望她, 原來佢喊緊, 問佢做咩喊, 佢話: 我唔鍾意新加坡, 我要返屋企....以往去咁多次日本都未發生過的
沿途介紹新加坡有幾靚, 又提她我們會去好多小朋友玩的地方, 佢都係想走....約半小時便到酒店了。 我不是訂Fullerton Hotel嗎, 好英式o個間喎? 過咗嘅, 去咗旁邊的Fullerton Bay Hotel....
望清楚訂房封confirmation letter, 又真係呢間喎!? 不過睇落都唔錯吖, 服務又非常好...
搞好手續便到我們的0210號房....
本來係訂Bay View Twin Bed Room, 但他們說沒有Twin Bed只有King Size Bed Room, 幫我加多張sofa bed喎, 對我們o黎講無問題喎....
可能之前真係咩都唔係自己揾, 在無期望下有驚喜, 間房好舒服....
雀巢的咖啡機....
又係呢類"看得透"的設計, we like it.....
沐浴用品係英國的Moton Brown, 好清香好滑....
一睇就知唔係日本, 無得洗pat pat...哈....
淋浴間的花灑就唔太得, 但無入鏡, 頭頂個大"蓮花頭"就好勁....
書桌旁, 隱蔽式的各類插頭, 上網免費, 不過我哋今次一切從簡, 無帶電腦....
外有一個露台, 看到的就是這景色。 我估就係因為我同agent講要有bay view所以她便幫我訂這房吧! 後來知道原來另有露台按摩池房, 早知要呢種啦....下次 
在房玩完一陣, 妹妹沒有再喊, 似乎佢好滿意呢間房 
係咪好似係北海道的第一天咁呢....
噢! 梅光軒, 沒有在旭川食, 就係呢樹食lu, 湯底唔錯但麵質當然無得比....
小姐們就食烏冬....
唔講真係以為在日本....
不過, 鏡頭一轉見到榴槤pancake就知在新加坡, 整返件先...可能太夜食已經唔新鮮 (收9:30pm, 我們成9點先到), 無傳說中咁好食...
食得好趕就要走, 連日式超市都無行到就要返酒店lu, 排隊等的士都等咗好耐....
先上頂樓的泳池參觀, 都幾靚喎! 揾日去游吓水先....晚上有唔同的event, party...
返房休息啦! 先要用房卡"嘟"開"盡頭的門, 再過先到房....
附加的床已經開咗, 感覺好似返溫泉酒店時已開了tatami咁, 又o黎??!!
兩位小姐一邊浸浴, 一邊睇電視, 舒舒服服的完結第一天的旅程!
Zason+2T : "新加坡" 都唔錯喎 , 我都未去過添 , 係呢 ~ 果度講乜野話架 , ( 國語 ? 英文 ? 馬拉話 ? )
回覆刪除可惜我份人一向都係死硬派 , 誓要等到 "日本" 復活先至去 , 唔會諗其他地方 .
Bye Bye !
[版主回覆04/24/2011 16:50:00]man wai: 我有小朋友唔可以"死硬"呢! 所以真係要另覓遊玩地方, 不過真係諗黎諗去都係日本 ... 下次真係唔知去邊好lu!
新加坡好多人種, 我多數同佢地講英文(其實除酒店之外, 馬拉人/新加坡人的英文有點"難"聽, 好多時唔知佢講咩), 但有時原來又講普通話, 要即時轉台, 好多時真係唔知對方用咩語言...
呢期都好多人去台灣, 新加坡! 不過你避開左個假期好D.
回覆刪除想問..係房入面枱面上面有個盒, 一粒粒彩色個D係咪咖啡黎架? 都好多款口味咁喎!
[版主回覆04/24/2011 20:57:00]雀巢咖啡, 雖然有唔同款但我覺得款款差唔多味道! 我唔係在酒店飲知的, 我的同事有兩位都係用呢類咖啡機, 機唔貴千多元但買咖啡一定要用佢, 我就喜歡咖啡豆即磨的 所以情願在酒店餐廳飲
哈哈，我都記得Orchard road 有間高島屋，而且新加坡依加改變咗好多.....
回覆刪除[版主回覆04/24/2011 22:43:00]烏節路我只係想去呢道揾返好懷念的感覺 小朋友可以玩的地方好似多咗, 但始終新加坡都係細, 好快可以玩晒, 同埋無咩天然的靚景點, 加上坡紙都唔平, 其實就唔多抵玩, 不過論安全, 方便, 都係唔錯嘅選擇
妹妹既心情大家都明白，換轉係我都會喊 相信媽媽你都一樣眼淚在心裡流 o者
回覆刪除呢間房幾錢呀 ? 真係幾靚喎 ! 聽講新加玻紙水好高，一張碌架床都要 $500 喇
[版主回覆04/25/2011 18:37:00]我都好奇怪, 都未開始旅程??? 不過可能因為她由歲半開始去旅行就只有日本, 雖然唔同地方, 但日本的氣氛她已自然地習慣咗, 今次新加坡在機場的感覺都唔同(正確係在飛機上已唔同), 所以她有點不安吧!
好實在的價錢真係唔清楚, 因為我係日本轉新加坡, agent一次過一條數去搞(我真係咩都唔太理就出發), 只大約知係3千左右一晚, 只包大人早餐, 小朋友另計約坡紙2x一位!
妹妹扭計計 , 去慣左日本呀 , 認識唔同地方都好 , 又未必以後唔去....
回覆刪除吓 ?梅光軒....連去新加坡都掛住日本
[版主回覆04/25/2011 18:41:00]基本上佢係好情緒化的, 一些唔係習慣了的東西會不安一段時間, 不過喊我就有點意外囉 但始終係小朋友, 熱咗身有得玩就無問題! 依家成日問幾時再去番間酒店....
我哋個行程, 一個一尾都係日本feel
完全明白妹妹的感受, 我2個女去到沙巴都有相同情況出現. 佢哋只係好單純地即時表現出嚟. 而我哋有"哈日"症嘅大人多數只放在心.
回覆刪除[版主回覆04/26/2011 20:18:00]你去咗沙巴? 幾時出blog 今日見新聞話關西其實無咩問題, 心思思想帶她們聖誕去大坂的USJ, 不過核呢樣野真係睇定d先, 特別係小朋友....
我都係去唔成日本，取消咗後曾經有一刹那念頭想去新加坡，之前都去過新加坡4次，不過最近個次都已經係差不多8年前，宜家都好多嘢唔同咗，再去都只係為玩USS，但後來發覺又唔係真係好想去 (或者遲D)，加上宜家D坡紙又唔平，最後改咗跟團去咗杜拜6日，啱啱尋日返嚟，宜家開始整理緊D相，有興趣遲D嚟我個blog睇吓。
回覆刪除[版主回覆04/28/2011 22:12:00]USS好細咋, 可能你囝囝會覺悶呢! 杜拜, 我無諗過的地方, 我好怕中東人 等睇你的遊記有多些認識....
間酒店好靚, 錯有錯著!
回覆刪除[版主回覆05/02/2011 22:29:00]如果自己一手一腳搞就唔會有呢個意外, 今次咩都俾人幫手反而有驚喜