2011復活節前夕~估唔到去咗新加坡 (第二天)

4月16日   (星期六) 多雲 > 雷雨 > 天晴

小姐們最喜歡浴室的小電視, 妹妹擦牙都可以拉出o黎睇, 仲可以同家姐仔一邊講卡通片的劇情....

搞掂就落Clifford食早餐, 今日好焗唔想坐外面....

呢間酒店係好傳統英式, 大少特別喜歡英式的服務,  而且無論食物質素同種類都好滿意, 呢塊煙三文魚真係食過咁多次真係算好高質素, 那甘香的味道充滿在口腔歷久不散...

蛋類食物都係廚師即煮, 不過沒有妹妹喜歡的烚蛋, 經理便叫廚房弄給妹妹, 那碟橙都係專登切成一塊塊方便家姐仔食的.... 

我沒有影太多餐廳內的相片, 因為環境似乎不太合適, 為免引起別人不安我也識趣地沒有再影  

返上房收拾去玩的物品便再出發 。 兩位咁都玩餐飽....

在大堂等埋大少確定晚餐的餐廳.....

確認咗晚餐係在The Fullerton Hotel 的 Town便出發....

在正門對面有一小展覽館, 又入去一看....

酒店外的水池...今天真係幾焗, 似乎會落雨...

團友們在門外等的士....

去東部的Wild Wild Wet。 有諗過將此遊玩點放最後一日因近機場, 但考慮過只係半小時的車程, 不想最後一天太趕同要處理行李, 都係第二天便去了...

上Wild Wild Wet的網都知係在一個叫E!hub的地方, 的士都係在那娛樂城正門給我們下車, 一入已係一個小朋友(幼兒)的室內機動遊樂場, 再向右行便是這水上樂園....

買了家庭套票便入場, 都幾多唔同款式遊玩設施, 小朋友可以"捐"餐飽, 小姐們話呢個水上樂園好玩過日本那些喎, 我就覺得因為呢樹比較"進取", 日本那些太怕小朋友受傷所以都偏向溫和....

呢桶水好勁架, 就快倒水時會"叮叮"響, 四方八面的人就係坐定定等照頭淋, 我係未到最勁時影的, 影完即收埋相機閃, 唔係就.....

太勁, 妹妹話驚走得快好世界....

跟住去玩漂流池, 去到一個位會有路人甲乙丙開槍射你....

三父女玩得好開心...呢個池的漂流速度比日本的快及好玩....

去到另一個有旋渦的位, 妹妹好緊張, 之後話好好玩...

呢個係類似海盜船咁, 不過係坐o係隻大水泡兩邊"西"....都未叫大小姐玩雷雨殺到....所有人要返入室內....

呢場雨應該都要落一段時間, 人群便先去食午餐....

水上樂園對面的food court....

食海南雞飯先....都幾好味吖!

食飽, 小姐們話唔想再玩水, 因為都玩咗個半鍾夠喎, 想去室內遊玩場玩, 呢個摩天輪好靚, 不過無坐....

今日另一主打, E!hub上面的Explorer Kid....

成個場的全圖  我已有所準備帶長袖衫褲同襪, 點知原來家長都要穿襪, 於是又要買, 他們的襪有膠粒底, 小朋友玩時會安全些, 如果自己有記得帶去, 反而呢個場無要求一定要穿長褲....

大蘑菇下係手工角...

兩位小姐有新挑戰, 家姐仔已一馬當先, 妹妹考慮中....

好! 我又o黎....

呢個遊戲係我同大少覺得最好的, 可以訓練小朋友挑戰自己, 要過唔同的繩陣,  家姐仔話都幾驚喎, 妹妹就緊係唔敢玩啦! 其實我同大少覺得妹妹係可以的, 不過佢自己無信心咋....

又去玩要另外附費的ball game, 這半小時係唔計在整體入場時間內(收費以小時計)。 初時只有她們兩姊妹, 但後來旁邊的生日會完了, 一大班小朋友殺到, 那些波波唔夠分, 唔駛兩分鐘, 所有波波唔見晒...

玩完波波又去玩個"倉鼠"迷宮陣同玩sir滑梯 (我成日覺得呢個遊玩設施內的小朋友似倉鼠)  個滑梯無Q立方那個咁激, 但都好好玩, 幾快架! 我試過, 因我要先sir咗落去等影小姐...

另一邊又有白色波波池, 好似在泡泡內咁! 佢哋兩個好搞笑地玩"hide and seek", 就係成個人"捐"入d波內, 另一人去揾...

玩到真係唔想走, 家姐仔話: 我知天父專登落大雨, 等我哋可以入o黎玩耐d, 太好玩驚我哋唔夠時間玩呀! 唔...算你都有另類感恩之心啦  

下一層有保齡球場, 大少帶她們見識吓喎....

呢個bumble car唔係Explorer Kid的, 要出返去另外買票, 奇怪地又唔係在門口賣票, 係要落返地下買, 好唔方便....

每次5分鐘, 好好玩咁! 妹妹在這第一次受傷, 因排咗一段時間, 到自己時太開心, "仆"到去玩又見唔到有一級, 成個扒在地上, 見佢"破破"吓行上車, 但上咗車又玩得好起勁喎, 奇怪, 佢無理由唔痛喎  玩完之後見到佢隻腳都幾傷吓, 上5吋下5吋個位瘀晒, 有兩隻瘀蛋咁, 又流血! High完先識痛, 所以玩嘅魔力真係好大....

商場有一小檔賣這些patchwork 動物公仔, 我覺得好靚, 小姐們正在選購心愛小貓布隅....

5時多要走啦, 因為訂咗枱食自助餐 。 在的士內拍的, 好有趣, 隻船在Singapore Flyer內... 先回房梳洗便行去對面的The Fullerton Hotel....

Fullerton 的Courtyard, 我們去lobby的 Town Restaurant...

可以選坐在室外....

但我們選室內, 涼快些....

大人食Seafood & BBQ 餐, 而小朋友只要 Seafood 。 食物水準...老實說有點失望, 生蠔薄過張紙...

小朋友頭盆又係日本o野....

家姐仔仲俾佢激死...主餐係咁!

我和大少的主菜, 唔掂! 如在香港的洲際食物係咁嘅水準, 實俾人投訴! 燒牛扒硬過鞋底, 龍虾"梅"過梅菜, 大少仲有羊扒, 都係唔得, 其他只係ok....真係諗都諗唔到...

甜品方面好弱, 那個朱古力噴泉旁邊的水果砌成一棵樹咁, 小朋友係攞唔到, 大人都要好小心, 唔係成棵跌落地....

呢間Fullerton外表真係幾靚, 不過可能係旅遊景點, 大堂, 酒店外都好多遊客, 反而令我哋唔太喜歡, agent錯有錯着! 而且講服務同食物水準, Bay那間真係好得, 如果下次再去新加坡, 我們已決定再住Fullerton Bay....

沿Quay散步回酒店, 欣賞吓新加坡的夜景....

返到房緊係又一齊浸吓浴, 用埋酒店的bath salt, 好relax啊!  突然露台傳出音樂, 原來對面的Sands有激光show, 好似"幻彩詠香江"咁....好似係10點同11點各一次, 因為11點那次時, 各人都瞓了, 我又聽到音樂和見到有射光, 又出露台睇咗一陣....

今日雖然行程簡單, 但我都好攰lu, 好快又瞓着啦!