酒店床好迫, 大人就唔瞓得太好! 有3晚添呀
今日行程好簡單, 只係去玩水, 雖然係玩唔係游, 都算做運動架, 食早餐入電先!
太子酒店的早餐都唔錯喎, 算多選擇出菜都快, 眼見大部份都係日本團。
嘆完早餐就出發去果王子溫泉/水上樂園, 本來想訂呢間酒店, 但呢幾日好滿, 咩房都無。
日歸客入口...
放好鞋及在這俾錢就可以玩啦....
呢個水上樂園好o岩我家小姐玩, 好繽紛又多野玩, 不過原來只係波波池至可以影相咋!
室外都有得玩, 我偷影咗一, 兩張小姐相, 俾救生員哥哥發覺, 不過佢想過黎同我講時我已經收好相機, 反正我都"得米"lu, 費事哥哥要專登留意我, 我的相機可以收工啦!
玩完pool再去溫泉區浸晒所有溫泉都係時候要走啦! 我哋由11點玩到5點多先走, 午餐都在池邊的餐廳搞掂, 個烏冬幾彈牙架! 梳洗完小姐們又在入口的果子店買小食, 今期愛上醬油小丸子....妹妹正在叫大少買俾佢食啦!
去幾次北海道都無試過成吉思汗燒羊肉, 今次就專登安排倍大少食, 因我和大小姐唔食羊, 但聽講呢種食法羊肉無咁羶 , 可以一試! 但成吉思汗店好唔方便有小朋友一齊, 所以揀咗去札幌啤酒廠。 旁邊就係呢個Mall, 食完可以行吓....
成6點lu, 已過參觀時間, 於是去揾邊度有得食燒羊肉....
原來夏天有得在室外食架, 好有大通公園啤酒節feel呀! 一於係度食啦! 3500yen一人放題, 小朋友半價, 任食任飲....不過以我哋嘅食力, 只係掃到3碟咋! 那些羊肉真係唔羶喎, 我同大小姐都接受到, 不過嗜羊的又可能會唔喜歡lu....
食飽飽去行吓Ario, 都幾多野行又幾好行, 好地道的商場咁, 只見日本家庭, 買咗少少野都返酒店啦, 小姐們的電又用完, 是日行程完畢....
嘿 . . . 嗜羊的朋友系北海道, 會大開殺界就真. . .D羊好食到呢 . . . 9月喺札幌有秋祭, 點食都得, 大通, 大丸前都有. . . ^OOO^
回覆刪除[版主回覆09/29/2011 11:57:17]但係一邊大開殺界一邊又話d羊唔夠羶呢! 我有個朋友咪就係咁囉!
點解唔比影相? 去咗咁多次都未食過羊, 因我都係唔食, 牛都唔食tim...
回覆刪除[版主回覆09/30/2011 21:53:10]唔...其實理解嘅, 其他泳客可能驚俾人影到嘛, 不過我去咁多次日本水上樂園都好少俾人阻止, 所以開始時都會試影睇吓工作人員有無反應先。 咁你咪唔駛去揾和牛食囉! 我初時都諗我最多食一塊起兩塊止, 不過呢種食法又或者正確d講係北海道羊真係唔太羶喎, 我都食到7-8塊, 不過後來可能食多咗先有少少羶嘅感覺咋!
呢間果子王國酒店 , 好似係 "東X遊" 既主場 , 有冇遇見香港人 ? 啤酒館場外露天燒烤放題 , 真係正到冇朋友 , 俾我一於食到盡 . ^_< !! Yeah ~
回覆刪除[版主回覆10/12/2011 21:26:57]我都記得呢間係有香港團的, 但當日就見唔到有港人, 得我們這一家外國人咋! 你就真係要去啤酒館食羊肉放題啤啤啦, 好o岩你! 大少梗有啤啦, 雖然佢要揸車...嘻嘻...
哎呀, 呢間王子王國(我成日叫錯佢做果子狔王國)我之前JOIN過三次東X遊既自由行套餐都包架, 所以住過三次, 但三次都係冬天, 都唔知原來夏天真係好熱鬧好多野玩喎, 啱哂小朋友^^北海道名物小肥羊我都未試過, 因為次次想試都話寧願留個吉位放靚牛, 等我下次都試吓羊先^^
回覆刪除[艾蓮回覆10/18/2011 15:20:28]係呀, 三次都係同一間, 因為早期東X遊既自由行五套餐係包三晚札幌市內加一晚果子狔架, 近幾年我都無幫襯呢個套餐, 响札幌有免費接駁巴士直達, 冬天可以享受雪中溫泉, 但你呢個泳池就唔開, 都無其他野玩架, 但佢包埋就唔拘囉, 我個BLOG係寫09年開始既遊記, 無果子狔睇喇, 同埋我好多遊記都爛尾, 真係唔睇好過睇喇, 所以我好佩服你地咁用心寫遊記, 我就懶到暈, 都係睇人地嗰D開心D
[版主回覆10/18/2011 10:56:01]等我下午有時間去你個邊睇返你的冬天果子王國先!
[版主回覆10/18/2011 10:54:16]三次同一間? 咁酒店冬天有咩玩? 是否好似一些滑雪Resort咁有小朋友雪地樂園? 北海道羊羊都好紅喎, 下次唔好咁偏心啦, 放佢落肚啦!
呢間果子王國 summer 我都去過 , 佢 d 自助餐算不俗 , 幾啱一家大細 hea 下 , 上次我勁食 ice cream 食都好飽先走 , 不過浸温泉 , 玩水都幾入 , 間 hotel 好大
回覆刪除[版主回覆10/31/2011 21:37:53]我就係睇中呢間酒店可以游完水直接返上房, 再去食燒板燒或自助晚餐, 輕輕鬆鬆又懶洋洋就一日, 不過無房都無計! 我已經連套房都睇埋, 都係無! 所以都係緣份o黎! 札幌啤酒廠我哋都係第一次去, 仲要一連兩日都去, 不過就無入去行喎!? 露天燒羊肉真係幾有風味架, 有機都試吓吖!
[電占 豆豆 幸の旅日 World ^^回覆10/27/2011 11:22:13]札幌啤酒廠我地一次都未去過 , 見你一家可以露天咁燒 , 咁樣小朋友都食得開心 d