2007愛上北海道花花世界 (前編)

自從2007年暑假, 係無咩詳細計劃嘅安排下, 第一次踏足一個令我們一家愛上嘅地方北海道!  雖然都有睇過吓旅遊書同揾過吓資料, 但當實實在在的美景o係眼前出現時, 立即愛上了, 有點不能自拔....又好羨慕富良野/ 美瑛的民宿主人, 呢D就係我同大少都好想有嘅生活啊!

以前從來無諗過會學人寫blog, 影相不太多, 而且大多數的照片都係小姐們的成長記錄, 所以可公開分享的又唔多...直至最近發覺有些東西開始漸漸遺忘, 於是再番看同組織吓相片,  希望簡單地回顧番早兩年的旅遊點滴 好! 時光倒流2007暑假吧!

7月19日   (星期四)

雖然兩位小姐唔係第一次坐飛機, 但2005年的大阪一行, 妹妹喊爆機艙, 都令我有些擔心, 幸好長大了識得睇吓電影, 玩吓遊戲機再瞓吓, 5個小時嘅機程總算順利。

第一天, 我們從千歲機場坐火車直到札幌JR Tower日航酒店, 地點相當方便。 三位團友先o係房小休一會(因妹妹仲細要瞓一陣), 我就去咗酒店樓下的GAP掃童裝。 妹妹好貪靚, 佢身穿的紅裙就係當日買的, 即着!  會合番之後本想去根室花丸的, 但太多人了, 於是轉戰拉麵共和國, 可是當年幾間拉麵店都好似唔太吸引, 我們便在同座的一間壽司店食美味的壽司了, 在北海道壽司都有好高嘅水準, 好味!  食飽飽就去了Akachan同Namco直到差不多十點先回酒店休息。

7月20日   (星期五)

第二天, 天陰陰有點兒凍添, 好似得17,18度咋!  窗外景色, 遠望札幌巨蛋。 在Toyota取車後便直往富良野。 這是我們第一次自駕, 大少的朋友提過日本自駕遊之後, 我便揾資料同計劃行程, 所以第一次出征北海道的日數唔多, 亦係對北海道的初探。

去到富良野我們先要餵飽小姐們, 去了好多人都讚的福壽司 這是看旅遊書介紹的, 期望也不大, 但一見到真正份量同新鮮度, 好味呀!  小朋友的鰻魚飯都一流, 家姐仔到依家一想食鰻魚飯都諗起福壽司!  (個人覺得好味過名古屋的名物)

食完美味午餐便去芝士工房。 小朋友好高興咁走去搾牛奶, 點知她們好激動咁話: 媽咪! 假嘅...好彩日本人聽唔到仲以為她們好開心。 我唯有入錢俾佢哋玩搾牛奶安撫吓她們失望嘅情緒, 再去旁邊的雪糕店滿足吓食慾又開心番

之後去咗果汁工房, 買了幾樽果汁在車上慢用。

小妹妹俾我哋放咗入酒桶, 有趣!~

工房外係一個小牧場, 小朋友又可以餵吓馬仔喇!

家姐仔旁的不是大少, 係工作人員, 他係o黎監視我們的, 因後來我先發現原來餵小馬要買飼料的,  可能他見我們餵草怕小馬食錯o野掛 其實佢可以直接話我哋知喎!  (後來聽講已經不能再餵了...唔通真係關我哋事?)

今日最後一個景點就係富田農場, 第一次見一大片薰衣草田...好靚呀!

低"炒"七彩花田!

唔記得係咩花, 我第一次見的, 好油畫的畫面, 但係真真實實...我最鍾意反而係呢種花啊! 我們到達富田其實都成五點, 那些旅遊巴陸續離開, 所以都好少人, 可惜天色亦開始暗, 沒有影到更加美麗的花花世界。

離開富田便去附近的Cottage Himawari, 我們由天還是有點亮揾到天都黑埋都揾唔到入口, 大少又唔肯問路, 話o係附近一定揾到喎 但揾到七點仲未見到, 在我發晒脾氣之下我去問路, 好彩有位好心的女士, 自己開埋車帶我們去啊! (p.s. 原來我們經過入Cottage的小路口N咁多次, 但天黑又無燈睇唔到路牌呢!  到第二年再住呢間民宿都係揾咗一陣子路先揾到, 因第一次係人家領路又黑見唔到有路牌啊! 所以真係唔好入黑先去民宿!  路在口邊, 去旅行唔識路問人係一件平常不過的事, 早些問人也不用走了那麼多寃枉路呢!)

7月21日   (星期六)

又係一個美麗的早上, 食完早餐小朋友玩樓梯都可以玩餐飽!

有同小朋友住過呢度應該對呢個畫面好熟悉啊!  所有細路都係一樣的!

富田咁近無理由唔去多次吖!  先o係Melon House食富良野蜜瓜, 睇吓小妹妹食得幾滿足!

愛食, 愛買的小妹妹都買咗一包乾薰衣草返屋企呢!

愛玩的家姐仔, 諗緊點玩呢架o野!

小妹妹似唔似"篤"魚旦呢? 其實佢掛住睇戰利品之一的沐浴珠成日唔望鏡頭咋!

跟住我們向美瑛出發, 沿途一大片草地, 田原, 哲學之木...好舒服啊!  先到見晴展望台, 當時有人行婚禮啊, 又睇咗一陣。

兩位小姐通山跑, 大少又摘了很多蒲公英教她們吹...

再落番山去千代田牧場喇!  原來小鹿好鍾意食小黃花的。

餵飽動物但原來我哋呢幾隻就好鬼餓, 於是緊係去牧場出名的餐廳食牛扒啦!  不過要等好耐位, 到有位又要等好耐先有得食, 餓到成3點呀! 所以如安排了去呢度食飯要預夠等的時間啊!

食完個晏餐, 要把握時間去四季彩之丘, 我們只在門口附近行咗一陣, 因為小妹妹眼瞓唔肯行喇!  而且大少話今日睇花都睇夠喎,  唯有下次再去過囉! (今年一定會"慢"遊呢個花田!)

去到深山峠的Teddy Bear民宿, 小妹妹已經瞓到小豬咁,  大少就倍家姐仔在房外的遊樂場打韆鞦, 我就整理一吓行李。 我們的小屋有兩層, 下層係客/飯廳, 廚房, 浴室, 洗手間。

上層則有兩間房, 一間兒童房(當然小姐們緊係唔會自己瞓啦!)

另一間房比較大, 床尾那邊還有很多空間, 有櫃同大電視機。 妹妹那邊窗係通出露台, 外面就係遊樂場, 好方便小朋友出出入入咁玩。

妹妹瞓醒就去另一間小屋食晚餐啦, 都好豐富吓, 不過就無咩心思, 係將北海道各特產一次過俾你食咁囉! 大人, 小童都一樣, 所以我同大少又係飽嘔呀!

深山峠真係好荒山野嶺, 晚上屋外靜得令我呢個城市人有點害怕, 望住佈滿星星的天空, 好深刻覺得"人"真係好渺小。

7月22日   (星期日)

早上影番自己間屋, 看見樹旁隱約見到的滑梯嗎? 可以一出門就"sir"落去, 好玩!

嘆完早餐便去咗好近嘅Trick Arts美術館, 真係轉個彎就到。 入場費係貴咗少少, 但旅行有時又唔好太計較吧, 享受咪抵番囉!

離開美瑛我們便直往小樽。 一到步就去咗銀之鐘2號館食拉麵, 換Kitty咖啡杯, 又入咗呢間流冰館感受負40度嘅感覺, 嘩! 首先要鼓起勇氣跳入去, 已經頂唔順要即刻跳番出o黎, 個頭只係被急凍一秒已經頭痛喇, 唔好玩嘅!

第一次去小樽都一定係掃街同入唔同嘅館, 名物店買手信呀咁...行行吓就到咗小樽運河, 好多人好難揾靚位影相添...就係咁又一日, 由於出名的壽司店都要等好耐位, 小妹妹又眼瞓啦, 於是去咗有位嘅燒肉店晚餐。 都幾好味, 但相比起之前的街檔美食就有D唔抵, 不暢快!

快快食玩要返酒店啦, 這是日間補拍的, 當年仲係叫Hilton。