2012京都花見行 ~ 第四天

4月11日 (星期三) 雨

今日係最錯的一天, 差點冷病兩位小姐! 

出發前已租單車, 計劃踩單車遊京都, 但天氣預測都話會落雨, 諗住睇定d先再作決定。 離開酒店時只係落微雨, 而小姐們又好想踩單車, 又唔想臨時取消租車, 於是如計劃去單車店, 負責的小姐都叫我們要小心點啊!

一出大路便開始大雨, 行吓避吓, 好不容易才去到鴨川。 

大少續架單車抬落河邊, 都好重吓架...

家姐仔已經唔理我哋一支箭咁飛咗去, 妹妹叫住佢都聽唔到...

妹妹起勢咁追, 見到有斜路又上返路面...

大少又要追女啦..., 我仲忙又追又影...

雨真係無停過, 在巴士站避吓先!  原來在先斗町對面...

再行前少少決定食午餐先, 但落雨搞到我失晒魂, 唔記得原先安排去邊度食, 於是見到呢間就唔理三七二十一入喇...

大家都用咗好多小宇宙, 於是好快咁食晒成枱食物...

之前都在一些日本版的旅遊雜誌見過呢間餐廳的介紹, 不過就無打算試, 點知係在咁嘅情況下入咗o黎, 都唔錯喎, 幾好味...

休息夠又再繼續, 此時雨亦細咗少少...

睇吓我哋幾危險...

從相中可以睇到雨其實都唔細...

所以決定返轉頭去還車, 反正都濕晒, 一條氣返去京都駅!  沿途櫻花雖然好靚, 但都無心情睇lu...

回程路上, 因為妹妹的風褸已經濕得好緊要滴緊水, 途人都報以奇怪的眼光望我們, 他們的眼神似在說: "你有無搞錯, 點做阿媽架, 落大雨同兩個小朋友踩單車, 成身濕晒!" 去到七条通, 妹妹已經凍到冰晒(其實家姐都係), 含住兩泡眼淚唔肯再行, 我便一邊氹佢一邊倍佢推單車, 大少同家姐仔再鼓勵吓, 好辛苦返到去啦!  上到酒店房拿拿林沖個熱水涼, 兩位小姐今次的挑戰仲勁過學校的歷奇營...
 

唔想再濕身又想行吓街, 於是駕車去了附近的AEON MALL, 先俾妹妹扭吓蛋, 家姐仔又買吓小禮物, 獎勵吓她們今天完成非一般的旅程...

她們揀了吃壽司, 有小朋友啤酒添呀!  妹妹仲扮飲醉叫家姐: o黎吖o黎吖, 飲酒吖...好搞笑!

見到喜歡的太鼓, 緊係要玩返轉先啦!

呢日其實我幾自責, 一路上問自己搞咩呀?! 唯有安慰自己當係俾小朋友的特訓, 在惡劣情況下唔好放棄, 向前行到目的地...好彩佢哋無病到, 如果唔係就慘啦!