2012京都花見行 ~ 第五天

4月12日 (星期四) 天晴

由於昨天已一次過用晒酒店的早餐卷, 索性退房後直接到哲學之道附近食早餐!  今天天氣不錯, 一定要追回想去的櫻花景點, 所以取消了原先神戶的行程! 

未到10點已到哲學之道, 泊好車就見到呢間小CAFE "BAMBI" 我都好喜歡的小鹿! 

日本的包包, 就算簡簡單單都好好味, 咖啡都唔錯呢!



滿開的櫻花妹妹, 我真係好鍾意妳呀!  不過, 睇吓我d團友, 淨係行又唔等我....



呢度做學生真幸福...e...唔駛返學咩???



可能昨天落雨, 今日一好天整條哲學之道都迫滿人, 真係好難影到張滿意的相, 而且我仲成日俾人摧....

小熊一家都好悠閒咁在川邊賞櫻....可惜我唔可以行完一整條哲學之道就要走啦, 趕時間去下個站....

就係平安神宮!  嘩, 無雲都幾熱!  買票入場先.....

一入內園便看見粉紅一點的櫻花, 又係有指定路線去行, 熱鬧情況同清水寺差唔多....

行吓行吓就見到呢個signature scene, 聽到最多快門聲的位, 又真係幾靚嘅....



行完神宮又去返岡崎公園停車場攞車lu, 呢張相係在車內經過美術館見到好靚的櫻花趕快拍下的.....

想去白川, 袛園花見小路一帶, 是但泊架車在白川北附近...

周圍睇吓有咩o岩食, 又睇吓我d團友已經叉晒腰行, 唔多耐煩啦....



見到呢間拉麵店又諗起北海道, 一致通過入去食啦....好味好味....

食完繼續行, 差不多到花見小路時, 身邊好多消防車同我們一個方向行, 我們仲以為係有火警添, 原來有交通意外, 見到架小型麵包車撞咗落燈柱但就唔見有人受傷.....



大少見情況好亂拉我們行返轉頭兜大路行, 再入返去花見小路時見到好多人圍在意外地點旁, 呢個時候天空已有成10架電視台的直昇機在採訪, (但我們當時仍未知原來好大件事, 第二日先知當場死了8個遊客)...

繞過人群繼續向前行, 就見到在旅遊雜誌常見的白川....

叫做遊覽過呢條咁有特色的小巷...

在京都, 就是街角都有這樣的美景, 我真係好唔想走呀!

見到呢個石牌, 就快到停車場lu....bye bye啦白川....就在我哋開車後不久, 又有好多救護車在身旁經過!

本來下一個地點係植物園, 但去到附近(近半木之道)發覺應該唔夠時間, 就在這裡影了幾張相便離開了....

唉! 如果昨日係咁好天就好啦....

咁趕去邊呀? 咪就係嵐山囉!

先行去中之島, 我們帶晒地蓆想扮野餐, 點知都唔係o個個feel嘅...

企滿人的渡月橋...

畫面有點像宇治, 但我喜歡宇治多一點....

行返去旺過旺角的商店街, 去Yojiya Cafe食個 late tea先...

我唔客氣啦, 真係又睇得又食得, 好得! 特別係杯凍咖啡....

跟住去搵個竹林。 點解唔係旅遊書呀, 人哋blog呀, postcard呀見到嘅畫面??? 唔靚嘅? 好失望, 即走...

似乎在日本每個地方總有一間音樂盒博物館...

由嵐山去神戶都唔近, 去到都7點多, 於是唔去酒店直接去已預約好的餐廳食晚餐, 神戶Steak Land



我們怕油膩, 所以只要了2客普通牛加一客特上牛set同鮑魚。 個鮑魚好林滑又香, 兩位小姐食晒咁滯...

我們的決定係o岩嘅, 特上我哋真係唔太o岩胃口, 反而普通的就好like, 4個人食3份餐都好飽...



野菜都整得幾好味, 兩位小姐一邊睇一邊食, 好開心...

大少唔食甜品, 3份剛好!

食完晚餐行吓旁邊的商店便駕車回後街的The B Hotel。 算係幾乾淨, 價錢合理的商務酒店...

浴室沒有浴缸...



但這花灑都ok, 小姐們大鄉里未見過有得坐的企缸, 沖涼又玩餐飽!  這天好趕忙地又好On居地, 無神戶遊點但就在神戶瞓一晚而完結!