2012暑假有老有嫩去九州 ~ 第一天

八月十九日 (星期日) 天晴

計劃咗好耐同老爺去旅行終於都成事, 左揀右揀都係去日本, 因為比較有信心可以同時照顧老人家同小姐們。  老爺應該好心急同興奮, 一早就準備好同我們一齊出發去機場lu! 



直航九州只可揀港龍, 一到機場好自然就去咗國泰check in, 地勤小姐"笑"住咁請我們去G段先o岩呀! 架機好細吓, 正運餐中。 同老爺一齊時間預鬆好多, 今次唔駛最後召集先上機lu, 仲要係第一個添! 

小姐們竟然仲有禮物, 不過大小姐唔肯要, 仲俾個"有無搞錯"嘅眼神空姐!

比原定時間遲起機, 去到福岡過海關又多人, 已經係第一批出飛機, 但之前剛有部從韓國到的, 所以排咗成個鐘先出到!  先坐的士去Toyota 取車, 之後直飛佐賀太良蟹御殿。

去到七點四十五分, 只係遲咗十五分鐘咋! 架車一到, 酒店職員已在門口對名及迎接, 服務都幾好呀!  Welcome drink, 大人飲茶, 小朋友飲檸檬汁。

搞完一輪入住手續就去揀浴衣啦, 都幾多款, 小姐們好開心有大人浴衣着。



我本想訂獨立屋的房間, 但唔可以5人一間房, 所以唯有訂呢間, 不過後來再諗深一層, 同老爺一齊都唔方便在房內浸, 會去大浴場, 而且都想去, 咁仲好慳些!  大家換好浴衣便去今日重點, 蟹宴晚餐。 一落機山長水遠就係因為老爺最愛食蟹。

可能我們已經係最夜食晚餐的客人, 一坐底食物就不斷送上, 由於忙於應付侍應大嬸及安頓各人, 之前的先付呀, 什麼什麼呀都唔記得影lu....剌身好鮮, 老爺唔食魚, 我同大少食三碟。



小朋友餐都唔欺場, 蟹蓋入面係飯, 好香好好味架。

主角出場, 大人一人一隻, 大嬸在旁拆蟹好似表演咁....

先拆好小朋友的小蟹。 蟹的肉質比較"林", 食蟹都係北海道最好!  三隻大兩隻細蟹已經好飽, 老爺都食得好滿足!

鮑魚可剌身及牛油燒, 都好鮮甜及"林"....



佐賀牛陶板燒, 呢個雖然係三人份, 但就算小姐們幫口食都係食唔晒....

燒螺....

仲有條魚, 我已經投降....

呢個湯好清甜又靚....



好似中途仲有些什麼的, 不過太集中精神食蟹好忙, 最後太攰了相都唔影啦! 阿大嬸見我哋食到呆晒, 主動幫我們包好飯團, 還叮囑我們一定要食, 原來係真係好好食架!

返到房阿妹妹又係要跳晒所有床好似跳飛機咁!

休息一陣便攞野去浸溫泉lu....

小姐們話浴衣唔舒服, 要着自己睡衣喎!  途經貸切風呂, 但我們揀了第二早才用呢個無料服務。



到了, 男女分組時間開始....

看, 已是十時多, 人家都剛好梳洗完離開, 於是變咗包場....

黑麻麻, 咩都睇唔到, (呢張相我已經在燈旁影啦) 所以我哋第二朝早才一邊看海一邊浸溫泉lu...雖然八月九州好熱, 但晚上都有點涼, 之前還擔心會唔"爽死"添....

大浴場有人唔方便影, 影另一個內湯....那扇木門係SAUNA 房....

大家都歎完溫泉就落職員推介的休息室飲吓波子汽水同咖啡, 本來想睇星星, 但有雲而且對岸有光, 所以都唔係睇到太多星星。 望遠鏡那邊可以出草地的, 我們就在那看了一會星星....

一邊歎家姐幫我整的咖啡, 一邊睇吓電視, 成個人都鬆晒, 唔覺唔覺又hea到差不多十二點,  要返上房瞓lu....