2012暑假有老有嫩去九州 ~ 第二天

八月二十日 (星期一) 天晴 > 陰天

雖然塌塌米都幾舒服, 但唔知點解瞓得唔太好, 未夠5點就醒咗, 望住個天慢慢光。 從地圖看, 旅館對岸係熊本荒尾市, 有無人可以話我知, 那座高高的山是否阿鯀火山?

呢個時候約6點, 窗外風景原來係咁, 係咪潮退呢? 係時候叫醒小姐們去浸溫泉lu。
 

先上頂樓的展望露天風呂, 未有人呀!

原來好細吓, 我已經係企在盡頭影, 實景差不多係咁細架啦!



無耐開始有人到, 我們都浸了十多分鐘, 見應該唔夠咁多人一齊, 便離開去返昨晚的有明海之湯了。 都係呢條路, 日與夜感覺好唔同....

又係未有人, 我哋好早咩? 其實圍欄幾高, 浸在水中根本睇唔到個海....

從這門出來便是通往各貸切風呂的地方....

昨晚揀了長石, 每度門都好矮, 好似小朋友屋咁.....



今次真係可以慢慢浸住看海lu, 不過水溫超熱, 加凍水都唔太得, 妹妹點都唔肯落水, 家姐浸一陣已經話暈, 所以未用盡45分鐘就玩完浸溫泉遊戲lu。




返房會合男子組。 那些小屋就係溫泉啦!



去食事處食早餐, 一盒盒有咩呢?



登! 登! 非常日式的早餐, 竟然無樣o岩老爺胃口!!!  兩位小姐係咁叫爺爺加點豉油(在雞蛋旁那支)入白飯, 好好味架! 可惜爺爺係唔食飯架!!! 無計, 他只係肯食蒸籠內的蟹燒賣...

又去休息室飲咖啡, 坐係度飲舒服d....小姐, 兩杯熱啡吖唔該!



我們昨晚看星星的地方....

大堂, check in 係在樓級上的位置....

由於那些豉油好好味, 大少就買咗十多支俾老爺當手信! 好彩有車, 唔係就大鑊!  戰車亮相, 不過大少唔太滿意, 因為原本的車型應該有電動腳踏, 揀呢款係諗住老人家可以"浪"住對腳坐, 點知實際係拆咗! 無嘅! 唔抵呀!



旅館全景!  沿途去碼頭見好幾間食燒蠔的小屋, 大少好想食架, 不過我們要坐船, 而且過兩天都安排咗食燒海鮮, 所以無入, 之後好後悔添! 下回分解何解呢?

大約40分鐘車程就到了碼頭, 先入停車場閘口排隊....

再行去對面買票, 我一早在網上訂了但早到咗, 於是改早一班船, 又順便睇吓土產咁啦!  好彩都識聽少少日文, 行行吓聽到廣播叫乘下班船的車主返去車度排隊等上船....

一架跟一架除除上船啦....

好得意, 同車一齊坐船, 泊好車我們便上去客艙坐lu.....



好似坐去長洲的頭等艙....



都幾舒服吖, 有電視睇唔怕悶....



出發啦....

我們出外睇風景, 有好多大水母呀! 不過一隻一隻的, 唔係一群群出沒....



真係好有去長洲feel....

約1小時便到熊本, 出了大路真係見到有個路牌指示去長洲架! 由於太突然見到又掛住笑, 唔記得影添!



先去優峰園, 本想摘巨峰提子, 但實在太晒(張相係就落雨時影的), 老人家又唔方便行上果園, 而且5人的入場費實在太貴, 買一大包食好過, 只係有少少殘念唔可以食即摘的提子啫....



咁就去食午餐啦....

 

o黎優峰園第二個原因係要食流水麵, 好o岩老爺同小姐們食, 爺爺真係只食麵咋.....



食飽飽就出發去阿蘇火山, 雖然上次去過, 但大少想帶老爺去睇火山, 而且不同季節有不同景色啊!  我喜歡綠油油的草千里.....



本來都係打算到此一遊就算, 但家姐竟然強烈要求騎馬, 二人同行平少少, 叫妹妹一齊騎又唔肯, 睇完家姐先話都想騎, 唔好意思太遲了, 要走啦....

 

見到啦, 見到啦! 湖水藍的火山口呀! 不過又係超大風, 吹到頭都暈, 睇完, 影完要走啦....



老人家攰了, 要早點去旅館休息。 今日住南阿蘇天文台Pension, 沿途落雨。  去到Pension要在外面的空地泊車, 落雨加石仔地, 搬行李又有行動不便的老人家, 都幾狼狽, 好彩小姐們都幫到少少忙!  圖中見到有露台的就係我哋間房啦....



辦好入住手續就要抬d行李上二樓, 有位哥哥幫手都好少少。 住本館最大應該係呢間Garden View的房, 而且有兩房, 適合我們的組合....

先睇女子組, 床頭的窗可望到餐廳, 旁邊的望落客廳....

田園feel 的洗盥間....

客廳有個小露台....



男子組的房, d床好似窄過我們的?! 醒起, 呢間Pension的床超硬, 小姐習慣一到房就跳上床, 呢一跳大家都嘩咗一聲, 唔彈嘅好硬添...

出太陽了, 好驚喜見到彩虹呀!  立即行出露台影底佢....

爺爺休息, 我哋去玩一陣先。 接待處旁的餐廳....

出返太陽梗係要玩吓先啦, 爺爺就坐在房從露台看孫女打波, 後來民宿主人的女也一齊玩, 佢d英文好純正無日本音的....



玩到咁上下又係食晚餐時間, 南瓜凍湯....

頭盆係沙律....

有兩款牛, 不過大少食咗其中一款無影到....

呢個又似魚膠又似蝦膠的東西都幾特別。  但爺爺完全無野o岩胃口, 淨係食包包同包....



甜品無咩驚喜, 但至少爺爺食生果都好吖....



小朋友食完第一時間去玩, 呢位就係小主人啦, 佢哋一餵魚, 所有小朋友都飛出去一齊餵, 大少話: d魚大鑊啦, 飽死!

玩完餵魚又玩熗戰, 先切好自己支熗就開火啦, 成班細路嘈到暈!  梳化旁的白窗就見到我們張餐枱, 可以一邊睇住佢哋玩, 一邊飲咖啡....

每組住客都可有一次免費家族風呂時間, 男子組又讓女子組享用。 今日浸咗好溫泉呀!

 

o黎呢間Pension最主要目的就係天文探索同觀星, 因為家姐超喜歡, 好期待添!  但可惜, 一: 先係天文講座, 聽唔明日文就預咗, 但片的內容就一般, 因為家姐都大概知太陽系是什麼之類, 二: 好不幸晚上落大雨, 唔可以開個"菠蘿盍"用超大望遠鏡睇星!  家姐表情超失望, 每人只可以象徵式望吓支鏡咁啦!  我教家姐同民宿主人講: 何も見えませんね！不過, 心底都好佩服呢位天文學家民宿主人, 佢真係好有心去推廣天文學, 相信佢日日都要講, 但他的敬業態度真係堅讚! 

無星星睇, 咁睇完Arashi就瞓lu!