2011雪祭王國~北海道限定行 : 第四日 (上集) 阿寒湖

2月8日(星期二)  ~  年初六 天晴/ 雲

又係新的一天, 天氣好似唔錯喎! 昨晚入到房天已差不多黑齊, 咩都睇唔到, 原來房間係對住阿寒湖的。

呢個就係我們的風呂, 水好熱啊! 設定咗係42度, 如加凍水無幾耐又會自己加番熱, 小朋友要適應吓先可以落水, 但我怕凍就好舒服喇.....

直望落去就係小河同通往阿寒湖的小橋, 可惜我唔記得試吓直接行出湖.....

趁團友未醒, 出去行吓先。 今早8樓天之原係男湯, 乘電梯時其他日本男人好奇怪咁望住我, 點解我會上8樓, 出電梯時我若無其事咁行去9樓的展覽廳, 嘻.....

展廳內有好多好靚嘅木彫....

唔記的睇誰的網誌見過呢個女孩, 見到真身佢真係笑得好靚....

大窗戶可看到阿寒湖, 一陣我哋就會去Ice Land玩啦......

房邊有一角落, 你可以好寫意咁睇吓書, 如果大少有一齊上黎, 我就會扮寫意影番張相, 幾有文學修養咁呀!

行返樓梯落8樓乘電梯, 牆上展出的沙龍相, 令住客可以欣賞到阿寒湖四季的美.....

其實如果下次有機會再黎, 我會住民族調的房再租家族風呂, 都唔錯呀!

再落1樓, 本來想去試吓大浴場, 不過在門口見到好多香港人, 都係返上房lu....

叫醒各團友去食早餐啦, 唔係又搞到好晏之後會好趕架! 我兩位小姐早餐就係食白飯, 粟米同豆已經好夠喎.....

不過今日有特別甜點, 水藻球啫哩.....

快快回房享受多次家族風呂先.....

嘆到夠鐘先走呀....

準11時退房, 行李已在大堂乖乖地等車....

先把車泊在酒店門外(當然通知咗酒店), 然後去附近行吓又玩吓....

不遠已見到必入店舖.....

今年多了"借東西的小矮人"的產品, 妹妹當然又要買小玩意啦.....

另一阿寒必去景點, 愛奴族村, 好多店舖都無開門嘅? 11點幾囉喎???

只有少量開始做生意....

參觀完又行返轉頭去阿寒湖Ice Land玩, 沿途見人家在整冰雕, 小姐們又睇餐飽....

家姐仔一早睇中玩兒童四駒車, 開心到佢吖, 妹妹又話驚唔肯玩  就係呢位人兄打大小姐隻手仔呀

家姐仔玩到好high, 咁200yen行一轉又唔算貴, 佢玩一次後唔想停, 我咪俾多1000yen玩多5次囉, 這時阿哥仔已經面色唔太好睇, 好似唔知阻佢咩咁, 之後大小姐返黎時睇唔到他的指示駛架車去特定位置, 佢一手打落小姐隻手度, 我當時已"怒啤"住佢, 不過帶住副"超"佢又睇唔到, 我幾想鬧佢呀!

行去另一邊見到冰梯緊係要玩啦, 又係high爆時間....

妹妹有得玩, 睇吓佢幾開心....

一人一邊, 嗌到拆天, 好嘈....

如果唔阻止佢哋, 真係有排玩呀! 不過下站係Tomamu, 都幾長車程, 要走啦!