2012 京都花見行 ~ 第三天

4月10日 (星期二) 天晴

兩位小姐有咁大間房任"碌"真係爽! 起身食早餐啦! (Lawson三文治)

把握時間落樓下影吓環境, 但有好幾位外籍遊客在大堂傾計唔方便打擾, 影吓個門口啦!  好奇怪個旅館招牌旁係掛法國國旗,  法國人開? 而且除了我們, 所見都係老外喎!



今日行程中有重要的活動, 就係穿和服賞櫻花啦! 看了幾間租和服的店子, 似乎只有"夢館"有小朋友的和服, 於是兩個月前已預約了。 真係好多人呀, 大少唔可以入去而我又好忙地揀三個人的和服配襯, 無影到相喎! 大小姐原來已經可以選成人和服了, 她們好快手就搞掂我們三人, 大少見到我哋嘩咗一聲!  第一個想去的景點係蹴上舊鉄路, 但睇過谷哥map係無停車場, 而且都預計到係食晏時間, 所以為咗泊車, 我訂了這酒店的自助午餐。



好嘛嘛的一餐, 相都費事影, 而且穿了和服唔係好食得落添!



酒店對面就係蹴上舊鉄路, 好近只係過條馬路咋!

見到滿開的櫻花我開始失控, 完全唔顧儀態去追兩位小姐影相。 初時, 小姐們都仲係穿木屐...



好快已經話腳痛要換鞋, 我早有準備啦!

沿鉄路真係好多人好多人, 兩位成日俾人叫影相好怕醜, 叫我快d走...

行到去岡崎疏水公園那邊, 見對岸都係滿開的櫻花啊!

夠鐘返酒店攞車去下個景點....

雖然去清水寺唔係好遠, 但人多車多塞咗好耐, 而且係單程路, 目標停車場滿咗又要兜過, 花咗好多時間...

影清水舞台時有諗, 其實我就唔太想o黎清水寺, 人一定好多而且係跟大隊順路行, 影相又迫又要等好耐, 有點唔知做咩咁, 不過去京都唔去清水寺又好似少咁d野咁...



行完一圈落返三年坂食吓雪糕, 睇吓手信又上車去另一景點...

專登安排今天去遠少少的地方, 而且穿和服坐車會方便些吧!  去到醍醐寺還有半小時便關門, 又要快快的參觀了。 漫天的櫻花, 現場真係好靚...



如果今天唔去清水寺放多點時間在醍醐, 相信會影到好多靚相...

小食店都開始準備收舖了....

我哋都買些小食坐下來小休一會, 直至聽到廣播才離開。

再行櫻隧道返去停車場lu...

還了和服便往連住兩晚的Kyoto Century Hotel。 櫻花期間, 酒店真係貴到無朋友, 呢間在駅旁來說算可接受了, 不過都係個句, 如果一早決定自駕就唔會揀佢。 服務就嘛嘛地, 我一個女人帶住兩位小姐, (大少去泊車)那位酒店大叔見我推唔到行李車上斜都有幫忙, 但就示意我自己推入電梯上lobby...



房間尚算可以, 只係舊點吧!

舊式浴室, 但算乾淨....

出街搵食啦!  一出去見到好燦眼的京都塔...

我哋沿京都塔的大街行到去東本願寺對面, 找炭火燒的食店, 但搵唔到又肚餓, 見有間食豆腐料理的便是但啦, 點知間店無門口張相的豆漿火鍋, 但坐下了又唔好意思走, 又是但要兩set他們介紹的course, 諗住食完再去第二間食....



成個course最好味係呢碟, 第一道菜, 其他就...

豆漿芝士意粉, 有點奇怪, 不過都ok, 叫食得飽又易入口咁啦...

在京都駅附近等過馬路時見到呢間和利館居酒屋, 入去飲杯先....



食點串燒, 小食便回酒店, 結束行程忙碌的一天...

 

 

2012京都花見行 ~ 第二天

4月9日 (星期一) 天晴 - 微雨

早餐都係去Lounge食, 食物比較正常, 感覺好過昨晚。

不過咖啡唔好飲, 酸酸地那種。

上午有小朋友spa時段, 不過我哋今日行程緊湊, 執好行李就出發lu! 從房間可望到的就是這景物。

第一個目標係奈良, 專程去餵鹿鹿唔係觀光。 兩位小姐餵得好興奮, d鹿鹿又食得好興奮, 兩個小人加一群鹿鹿通山跑, 好好笑!



妹妹俾鹿鹿追到走頭無路就出絕超: 無啦, 食晒啦, 睇吓!

就係呢群好大食的鹿鹿食咗我2000yen鹿餅!

餵完鹿鹿就要餵人類嘅小朋友。 直去宇治食綠茶麵。 由於本店有得泊車, 我哋就決定去呢間。 出名就緊係多人等,  約45分鐘就有位啦!

大少的午餐, 條魚好甜, 好似落咗好多糖的豆豉菱魚, 唔好食。

我們女子組的冷麵就好正, 綠茶麵都係冷比較好食!

最後緊係季節限定甜品啦...其實只係多咗粒櫻花!

我就嘆杯綠茶同食茶丸子....

坐無虛席, 食堂外是賣手信的, 但好多食用期都好短無買到。我們等位時逛小賣店, 有位大叔請我試飲綠茶, 好好飲的, 諗住食完飯先買, 但竟然唔記得咗!

o黎到宇治我緊係要去埋宇治川睇櫻花啦, 不過大少同大小姐飯氣攻心(其實係懶), 情願坐在車上眠一眠都唔行, 精靈的妹妹見我一個人就主動倍我同做我的小model。 咁靚的美景唔睇好浪費啊!

過橋行去中島, 又係唔少一家大細蓆地而坐。

 

如果天色不是這麼灰暗, 會更加美麗。

行到近平等院表參道就見到紫式部像。

平等院表參道多數賣茶有關的物品, 條街好窄吓, 又行車又行人。

其實都唔係好多野睇, 我同妹妹在道中間行返入小巷返宇治川。

返去與懶人組會合便正式往京都。

車程都唔係好耐, 不過去到近旅館, GPS帶我們行入一條非常窄的小巷, 當時真係好懷疑係咪GPS搞錯咗, 因為條巷真係窄到只係剛夠架車慢行, 而行人要站在一旁讓我們先過好驚險的, 去到十字路口要轉左, 但要幾手駄好慢咁轉彎, 就在這時車左邊撞到路邊的矮石, 倒後鏡完全睇唔到, 我在車內同車外的日本人一齊O晒咀...唉!

不久就到了在八阪神社附近的舞風館。 我們住和洋室, 這是我和大少的房...



這起居間亦係小姐的睡房....

很乾淨, 舒適....

應有的都有齊....



最愛這日式的沐浴間...

稍為休息又出發。 先在Front Desk 請接待小姐幫忙訂今晚及過兩晚在神戶的晚餐, 便去円山公園趁熱鬧。 見到有小食檔, 各人都有目標, 家姐仔食醬油小丸子, 妹妹食朱古力香蕉, 大少食呢條燒魚同飲清酒, 我食咩呢?  唔記得添....

這時正下着微雨, 但無阻遊人的興緻, 而且是櫻花滿開啊!

好快就見到呢棵有名一本櫻, 不過唔知係咪天色問題, 我又唔覺好靚喎!

日本遊人在櫻花下準備食晚餐, 大少當時有興趣在這裡食, 但一來落雨, 二來我們訂了枱啊...

行入少少望返轉頭, 見大部份遊人都係在欣賞一本櫻...

臨離開時已light up, 好似靚d....

由八阪神社正門行返出四条通....

手信店買的都差不多, 我只選了這兩間只有在京都才可買到的"特產"去入貨。 在這買了洗頭水, 護髮素, 潤唇膏(我覺得唔太潤, 一般咁啦)...

又係買洗頭水同護髮素, 加櫻花面油紙....

然後去牛禪食Shabu Shabu, Sukiyaki放題....

我們選了和牛, 切得都夠薄, 好好味! 吃了5碟牛牛, 兩份野菜已經飽得緊要。 要慢慢散步回旅館幫助消化!  今天行程雖然緊湊少少, 但可以滿足各人的喜好, 大滿足的一天啊!