2010櫻花初見之北九州 - 第四天 (下: 城島高原遊樂場)

4月3日  (星期六)    天晴

離鶴見岳很近, 好快就到。 可能今日星期六, 我們到達時相信係正門的停車場已滿, 經工作人員指示行上其他停車場。 仲好, 近D小朋友的地區添!  停車場都好多櫻花bor!

小朋友遊玩區入口。

o係望海攞咗遊園地的介紹有優惠, 慳咗幾百yen。 一入去見到呢個飛氈的遊戲, 家姐仔覺得好好玩咁, 要求大少倍她, 點知一開機, 嘩! 嚇到比較大膽的家姐仔扒咗o係大少個肚腩度, 唔好睇少呢個遊戲, 離心力好勁吓

未熱身就玩到咁激, 落返o黎面都青晒!  都係倍妹妹去玩煮飯仔先啦!

玩具屋外係兒童遊樂場, 不過其實適合幼兒多D。

經過小休後, 家姐仔又玩至愛, 兒童過山車。 妹妹本來已經細膽, 一開始見家姐仔都嚇到面青, 所以更加唔肯玩, 情願倍我影相。

呢個遊戲, 大少倍家姐仔玩咗一次都想作嘔, 點知小姐要encore, 仲要坐外圍。

家姐仔玩到唔記得我哋, 妹妹等佢倍等到發皮四, 終於要落命令倍妹妹玩先可以再玩其他, 佢先肯倍妹妹去幼稚些的遊戲區咋!  其實都有一個幼兒級的過山車, 家姐仔先試玩覺得無料到叫妹妹玩, 但妹妹都係唔肯, 無計!

玩完一輪幼稚遊戲又要食午餐, 就食熱狗同炸雞啦! 因為只有呢間餐廳有家姐仔想食的粒粒雪糕。 (以前香港都有, 唔知點解無晒!) 遠望由布岳。

餐廳外面就係滑浪飛船, 摩天輪, 過山車...比較激的遊戲區。

呢架就係樂園主打木軌過山車"Jupiter", 好長龍呀, 當然家姐仔都唔敢玩。

食飽又出動, 高級組去玩滑浪飛船。 o個隻係玻璃船唔會濕身, 但原來都好驚喎!

就在飛船排隊對面, 妹妹玩兒童高卡車。

由於唔想妹妹浪費時間等家姐仔玩, 所以我帶她返兒童區玩, 約定時間再會合。 樂園的通道都好優美。

去咗室內遊戲室, 先玩公仔 Licca。

森林家族。 個遊戲室有好多唔同的玩具, 男仔女仔都滿足到!

再過A室便是放電區, 就係等家姐仔, 妹妹o係度玩咗成個鐘。

後來仲有呢個大頭公仔同小朋友影相, 不過好似係要買咗佢嘅產品先可以影。

大少同家姐仔來會合時, 大少話幫家姐仔報咗名玩兒童駕駛學院因家姐仔見到時非常想玩。 妹妹聽到又話要玩, 於是一齊又過返去。 (其實在香港揾料時已知有呢個新遊戲, 亦係呢個遊園地嘅賣點, 不過我見要上堂, 怕小姐們聽唔明日文所以沒有特意安排, 但家姐仔竟然好想玩而又工作人員話無問題喎!)  Kids Driving School 真係要極力推薦俾大家, 好玩過Kidzania的學車遊戲, 因為好真實...小朋友好滿足!

交學費後先要家長倍同下上課, 學駕駛守則, 交通標誌, 有埋幻燈片睇, 好認真好似我係駕駛學院上堂一樣!

妹妹上堂時其實聽唔明, 但人哋舉手佢又舉, 好投入。 (妹妹是下一班的)

上完理論便出車喇! 第一次要家長倍同考車牌!

要跟道路規則, 轉彎要打燈...

學泊車...

學入油...

呢兩張相係小姐們已經Pass咗, 攞到車牌可以自己駕駛時影的。

合格可以攞車牌啦!..好開心呀! 媽咪

沿途風景又靚, 好好feel o架!  家姐仔話唔明點解妹妹會pass, 因她成日撞車, 又入錯線...有其他日本小朋友唔合格呀!  我諗可能係外國人, 他們覺得你好少會返o黎玩, 唔想小朋友失望, 所以都俾個車牌妹妹掛!

幣! 妹妹又炒車, 要工作人員幫佢推車, 好彩無受傷。兩姊妹玩完一次又一次 (考牌1000yen, 之後600yen一次), 直頭唔想走!  但家姐仔之前話要返去室內遊戲室玩, 我提醒佢先肯離開, 都玩咗成兩個鐘啦!  最後15分鐘就在遊戲室放電至關門。 佢哋話明天要再揸車, 但緊係唔得啦, 所以如果再去九州, 我哋一定會再o黎呢個樂園!

由城島去湯布院只係十多分鐘, 途經狹霧台可以腑覽湯布院, 近看由布岳。

我哋先到湯之坪的A Coop買餸, 因今晚係素泊, 會食火鍋。 呢間係金鳞湖附近的"湖畔",  睇吓, 廚房那兩大袋食物

睡房在樓上, 兩位小姐其實已經攰到o係床瞓緊,  我哋兩老搞掂先叫醒佢哋。

都好豐富吓o架! 有豐後牛啦, 甜蝦啦, 三文魚啦, 各類蔬菜啦咁...個湯底係用昆布做的, 好鮮甜。 飯後仲有蜜瓜做飯後果, 滿足嘅一餐。

我們的單位旁就係風呂室, 不過就係咁多戶共用的。 有班男人o係風呂入面嘻嘻哈哈好大聲, 仲成半個鐘都唔知搞咩, 等咗好耐先可以去浸溫泉咋!  由於共用, 我哋都係快手快腳, 浸一陣就返房休息啦!