花花世界的北海道已去過3次了, 一直都好想睇冬日各雪祭, 同感受吓白雪北海道的浪漫。
前幾年的冬天帶兩位小姐嘗過雪地的冷, 目的係為挑戰嚴寒的北海道作好準備, 這準備不是她們而係我, 因為我係極怕凍的, 起碼我可以有把握照顧到自己, 先可以照顧好小朋友, 而且她們現在都有一定能力去自理, 咁我就可以輕鬆點享受冬日美景囉! 
由於要同老人家過年, 所以可以冬遊的日數只有8天, 未能參與所有雪祭和雪地活動, 不過第一次就先去那些比較熱門的入門班, 有機會遲幾年再去高級班, 如浮冰漫步...
第一天: 到達北海道再取車都差不多天黑, 而第二天就會去道東, 所以會選千歲附近的住宿, 左揀右揀就呢間啦! 由仁之湯 (網頁圖片)
訂了露天風呂附客室
不過都會出外面的大自然露天風呂, 一嘗落住雪浸溫泉的感覺
第二天: 沿道東自動車道往十勝, 中途隨意搵個地方午餐, 或索性在帶廣食同小遊便直到 三余庵 入住。 最近她紅爆, 旅遊雜誌連期報導, 希望到時仍然保持到寧靜悠然的氣氛。 但好可能係我們一家最嘈 
好開心訂到呢間酒店, 特別她接受小朋友入住, 重要係好窩心的, 未入住已感受到她對客人的熱誠, 完成旅程一定會分享由訂房一刻的意外, 亦貪心地希望驚喜會不斷出現 
晚餐後會去睇十勝川白鳥祭。
第三天: 繼續道東行程。 入住酒店前, 先到屈斜路湖美幌峠, 砂湯, 硫黃山...等
同埋大少話要挑戰古丹溫泉 (網上圖片)
特別多謝網友Lan Lan的資料同親身經驗, 很好的參考啊!
之後再去一看摩周湖, 希望可以看到她的全貌啦! 
快速遊完主要景點便往多數網友去阿寒湖都會揀的 遊久之里 鶴雅
訂了別館露天風呂附客室 (網頁圖片)
晚上當然係去阿寒湖冬華美雪祭啦! 
第四天: 早上如有時間會快速遊覽愛奴族村, 因這天去Tomamu Alpha Resort 車程比較遠, 相信去到時 Kids Park 都差不多收檔, 可能先去VIZ Spa & Pool, 晚上主打Ice Village。 又特別鳴謝網友電占豆豆 和 Niseko2000的提點 
是晚會入住 Villa Sports, 方便去玩, yeah.....
Ice Village (網頁圖片) 真身好似無咁靚
第五天: 上午會玩雪雪, 睇吓有咩小童滑雪班。
(網頁圖片) 就咁睇相好似Kiroro吸引些
午餐後會返札幌, 預計傍晚到。 會入住 Richmond Hotel (大通公園) , 本來諗住大通公園旁的酒店, 但到可以訂房時已唔記得咗, 諗諗吓都係唔緊要, 反正都只會在酒店瞓同食早餐啊! 由酒店行去札幌雪祭會場都唔遠, 當晚先看light-up!
第六天: 早上先行大通雪祭, 之後如小朋友還想學滑雪便會去 Kiroro Annie Kids Ski Academy , 如不便先去白之戀人影吓相同整多個相片餅罐。 去邊都好, 希望還有日光時到小樽, 享受一吓浪漫雪景同美食, 夜晚重頭戲 雪燈之路
第七天: 早上會到另一雪祭會場 つどーむ会場 , 小朋友冬日放電好地方, 午餐後便往支芴湖, 入住 鶴雅 水之謌 。
(網頁圖片) 展望シルキーバス付客室
晚上行出去就係支芴湖冰濤祭的會場, 好方便啊! 
揀呢間真係因為呢個原因, 而且她都接受小朋友入住, 真好!
第八天: 早上在寧靜的支芴湖附近行吓, 就要去機場啦! 不過暑假時答應過小姐們會再去 Muscle Park 玩多次才去機場。
希望旅程順順利利, 始終係第一次在降雪量大的地方帶小朋友去玩, 安全真係最重要啊!
你 Day 2, 3, 7 條數又真係幾甘喎~ CNY 貴都無辦法, 最緊要有機位.
回覆刪除[版主回覆12/04/2010 21:45:00]要雪祭期間去又要就小朋友假期, 又想在合適的季節做/ 去當季的事/ 地方, 左諗又右諗~無計! 唯有咩都唔准買去balance返, 而且去埋呢次北海道可能要遲幾年先再去啦, 因為下個目標好可能係東北。 話時話, 我有個同事都係農曆年去北海道, 但跟團一家三口都預要約用6萬(計埋買野喎), 呢d時間去真係無得平! 所以你就真係重二人世界時歎個夠啦!
lan lan真係好好人, 佢都分享了很多好有用資料比我! 我今次都係去8天, 古丹溫泉我地都會納桃戰項目之一. , 一想到凍冰冰, 除衫個下都仲係掙扎中...
回覆刪除[版主回覆12/06/2010 21:48:00]我都有去睇你個行程, 會坐破冰船喎! 我諗住遲多兩年小朋友可以玩流冰漫步時一次過去網走, 知床... 古丹真係好吸引, 不過好肯定我無勇氣(就算只係除襪) , 我會在旁為大少打氣同影出浴照 你依家唔駛咁快掙扎住, 去到都未遲啦!
你好呀, 我都會在來年去雪祭...會留在香港過年, 所以初6先出發^^
回覆刪除[版主回覆12/06/2010 21:51:00]初六先出發咪唔駛俾附加費囉! 羨慕啊! 不過有得放就緊係咩都唔好理啦!
因為mami初5生日, 食埋飯即去機場呀 (坐凌晨機經關西去札幌)
回覆刪除不過有得放就緊係咩都唔好理啦! <-- 同意同意
[版主回覆12/09/2010 10:34:00]咁就真係要同媽媽慶祝完先去玩啦!
Happy Happy!!!!!!!!!!!!!!!!!!!!!!! Have a nice trip!
回覆刪除[版主回覆12/16/2010 22:25:00]Thank you! 咁你們一家去邊樹玩呢?
好羨慕啊! 幾時出發呀? 日元匯率高, 我依家好努力蓄咁彈藥留待明天年去. 你的遊記正好作為我一家的參考藍本. 玩得開心D.
回覆刪除[版主回覆12/21/2010 20:56:00]我哋好似輪住黎羨慕咁
Zason+2T : Hello ~ 我都會去果個 "古丹溫泉" , 不過純粹參觀 , 唔會親身示範咯 .
回覆刪除雪地自駕遊 , 真係要好小心呀 , 祝大家都有個愉快旅程 .
Bye Bye !
[版主回覆12/23/2010 23:30:00]man wai: 古丹溫泉咁大自然feel, 可能你到時都忍唔住要投入懷抱呢 如果你唔怕凍!
我都祝你旅途愉快, 而且你好似係一個女仔去玩, 真係有點替你擔心, 千其唔好貪去多個地方趕路, 天就快黑就要到住宿處啊! 萬事要小心, 唔好令在香港的家人, 朋友擔心
帶廣想食十勝牛 , 有無介紹呀 ?
回覆刪除[版主回覆12/25/2010 00:30:00]靚太，去帶廣唔係食豬咩！ 有一間燒肉店在帶廣與中札內之間，唔肯定係咪十勝牛（但咁近係嘅機會高些 ）焼 肉 だ い じ ゅ 園 稲 田 店 ，我上次本來想食但無睇清楚時間無得食。 由帶廣駅去２０－３０分鐘車程，至於帶廣市就真係唔知，未去過啊！
聖誕快樂！
我個final行程改好左, 乜都定晒啦! 我都會住鶴雅 水之謌, 不過就住最平個隻房, 無計, yen貴, 但都一樣好期待呀!
回覆刪除[版主回覆12/27/2010 17:03:00]睇支芴湖冰濤祭住水之謌真係好方便, 平貴完全唔係問題, 其實我本來都係想訂最平的雙人房而已, 但有小朋友唔俾所以先咁"狼"咋 我都好認真咁睇吓行經的路, 比較擔心的是在冬季的地圖, 由十勝至Tomamu一段的"道東自動車道"無咗????, 但我本地圖有的, 而上Google Maps有的, 又在最新情報的道路顯示都係有的, 所以好奇怪 我今年夏天先行完! 大少就話唔擔心, 無理由咁大條路會封喎! 大家都要記住, 安全最重要, 如路方面情況唔好就唔好勉強去個景點啦!
豚丼一定要試啦 ~~ 間店遠左 d, thx anyway~~
回覆刪除十勝至 Tomanu highway 無左 ?! 我都要行 ga wor~~
另外想問過左夕張 ic 去 tomamu, 應該行 610 & 136 由福山至占冠 or 兜多小小行 237 經日高峠條路 . Navi 叫行後者 , 但睇地圖似乎前者短 d.
[版主回覆12/28/2010 13:32:00]哎呀, 大少有提我間燒肉店唔係咁遠咋, 我記錯咗 應該十多分鐘就到(由帶廣駅)! 我會行237, 行上路多山路會危險一點呀, 經日高峠條路相對好行些。 我暑假個次就係因為夕張至占冠一段收費路有交通意外唔俾行, 要經夕張的國道行, 夏天都山明水秀, 但冬天就唔好行啦!
就算付費都要行, 何況宜家高速公路無料化, 更加要善加行用.
回覆刪除[版主回覆12/29/2010 19:28:00]為安全又好, 為時間又好, 我們多數有高速公路就行, 無料化就更加唔駛諗喇!
你個超級豪華團好正, 原來鶴雅 水之謌最平的雙人房唔比小朋友住.....
回覆刪除不過冬天揸車真係要好小心, 安全最重要, 唔好心急....
[版主回覆12/29/2010 19:33:00]係呀! 我問過他們有小朋友起碼要訂和洋室, 但俾多幾百元(港幣)就可以有私人風呂, 咁咪"癲"到尾囉! 今年處處都有大風雪, 老實講有少少擔心, 不過真係唔好心急, 唔好貪心, 唔好亂, 希望一切順利! 你返o黎啦, 好o野又Blog有睇!
Are you staying at the Tomamu Suite? Cos the other wing(just hotel room) sucks.... and always crowded with line up when going for breakfast
回覆刪除[版主回覆12/29/2010 19:38:00]No la! We booked the Villa Sports, hope it is not as crowd as Tower!! And we will try the new restaurant and not the buffet la, experienced before...hee...
在帶廣帶小朋友去六花亭食甜品.... 一定好開心 !
回覆刪除[版主回覆01/11/2011 17:39:00]都可能會去, 重想食蕃薯甜品添
我頭先剛剛研究過, 冬版個地圖, 個條"道東自動車道", "十勝清水IC"就停左, 我估可能要轉番去國道274, 再轉去38, 之後要行小路入tomamu, 不過, google map show出個條"道東自動車道"延到去富良野國道237喎, 唔通呢段係新開 ?
回覆刪除要再研究下先,.
[版主回覆01/12/2011 17:37:00]呢個問題我都有提出過, 冬季的地圖唔見咗十勝清水至占冠個段, 但Google Map係有架, 同埋我夏天剛行過, 正常過正常嘅收費公路, 無理由冬天會封喎, 所以我當有架啦... 同埋諗住取車時先問清楚道路情況先
鶴雅你訂咩Plan? 幾$呀? 官網有別館露天風呂附客室, 2大1小食buffet, 46800yen, 好似幾抵, 我諗緊轉唔轉.
回覆刪除[版主回覆01/18/2011 22:07:00]我唔知叫咩plan, 因為係直接email話俾佢哋知我係一家4人, 2大人, 2小學生, 別館露天風呂附客室, 要自助餐, 佢哋就收我57000yen! 咁你不如都轉啦, 山長水遠去到 不過其實我都想住民族特色房, 好似都唔錯, 但無得一家人一齊浸溫泉, 只可以我們三個女團友一齊嬉戲, 而大少就孤獨地浸...就唔好啦!
我check過宜家2大2小只要51000, 你要唔要講下價
回覆刪除[版主回覆01/19/2011 20:03:00]多謝報料 我剛send 咗電郵問, 有答案話你知! 不過我以前都試過住溫泉酒店, 俾錢時平過他們報的價, 他們說因為價錢調整了, 所以收返新價, 佢哋有時都好均真呀!
仲想問...email訂要唔要俾埋credit card資料?
回覆刪除[版主回覆01/19/2011 20:05:00]無喎! 從未問過, 只係確認咗訂房。
check 下jalan, tomamu 有新plan"平日限定", 應該啱你.
回覆刪除e+最擔心大風雪, 開車麻煩.
[版主回覆01/19/2011 20:10:00]係咩, 一陣睇下先 Thanks! 我都有少少擔心, 今年好似會落雪嘅地方都勁大雪, 希望到時天氣穩定啦, 要多留意天氣情況呀 我早兩日再問Toyota想要埋Tire Chain以防萬一, 他們話已有雪呔不能再上雪錬, 因為雪呔比較soft, 只叫我們要小心駕駛。
恭喜發財!!
回覆刪除唔使客氣 ，有好嘢梗係要分享啦，你係咪行程當中？一切順利，玩得開心d
回覆刪除[版主回覆02/15/2011 19:35:00]返咗黎幾日啦, 順利就一半一半, 希望盡快出blog同大家分享吓!
返咗黎? 好心急想睇遊記.....
回覆刪除[版主回覆02/15/2011 19:39:00]係呀, 不過未回魂咁 唔知點解今次返黎好迷茫咁, 好多地方覺得做得唔好, 有失敗的感覺 遊記會盡快!