2011復活節前夕~估唔到去咗新加坡 (第四天)

4月18日   (星期一) 微雨 > 炎熱

早餐在Fiesta食, 我們8:30am到都唔算等好耐, 約5分鐘就有位不過係室外, 穿過室內的餐廳就心感好彩坐外面, 因為好嘈, 戶外靜好多 ....

食物一般不作多講...室外的位就係對住泳池, 不過呢個池一眼睇晒, 小姐們話無興趣在這玩 ....

食完野行到最盡睇吓, kids area真係好小兒科 ...

另一面望回餐廳, 離開時排隊的人龍去到電梯大堂, 越晏越多人 ....

唔玩水就直接去Universal Studio, 門口個地球又被圍起唔見咗 ....

我們先向左行, 見Shrek Far Far Away城堡的 4D電影未係好多人排, 玩咗先lu....好好睇, 好好玩. 唔講你知等你哋自己有驚喜 ....

出o黎就係出血店同見到呢個迷你摩天輪...唔少得又要放低銀兩 .....

再入就係侏羅紀公園, 我倍妹妹玩類似小飛象的小飛龍; 家姐仔同大少去玩Canopy Flyer, 他們說當開始準備會激時, 噢! 玩完...! 

集合番便一齊去玩激流 ....

又係必玩項目, 一定要買雨衣, 真係濕晒, 大少包唔到條褲就"瀨"野, 不過天氣熱好快又乾番....家姐仔見人哋濕晒笑到卡卡聲....

路過見到Water World 1:00pm有表演睇, 於是在附近的快餐店食炸雞.....

準時睇表演, 幾好氣氛又搞笑, 一場o黎到要睇啊!...

睇完點幾鍾, 好熱 又肚餓, 大少又唔想在park內食, 而且我們又有另一地方想去, 於是又出Vivo City Foodrepublic食個地道雜食午餐....

小姐們想去Build A Bear Workshop, 由Vivo City行去 Harbour Front Centre 。一入去已失控, 先係揀喜歡小動物的身....

再揀音樂或聲音放入去, 本來個姐姐介紹放多個心臟, 等小動物有心跳好似有生命咁, 唔好喇啩, 我就真係心跳加速, 開始覺得"瀨"野  ....

跟住安自己軟硬的喜好, pump棉花入小動物身內, 小朋友負責踏腳踏, 妹妹揀bear.....

本來家姐仔揀Kitty, 俾我say no咗, 一來最貴, 二來唔好又係Kitty啦, 家裡已很多啊! 最後決定揀白兔....入好棉花後, 那位姐姐再給小朋友各一個布心心, 她們自己放入去公仔表示小動物已有生命, 然後姐姐在公仔的後面整番埋個"窿"....

小朋友再抱她們的baby去沖涼(扮的無水架), 洗白白個擦又要買, 其實又咪係普通的擦, 唉! 算買一個兩份用....

最大鑊係買衫俾baby着, 又裙又鞋又頭飾, 我不停咁話呢個唔好 o個個唔靚 ...

好囉好囉, 扮完靚去攞出世紙, 先要幫baby改名整張出世紙....

再去好似童軍咁宣誓, 承諾要照顧baby一生一世....

同阿姐姐玩埋"俾個5黎", 就抱番屋企啦! 兩隻野成千蚊, 大少塊面黑過鞋底, 我就慘被鬧鑊"金"....

"敗完家"就返去USS玩埋下半場, 個地球呀! 幅相 .....

]

路過見到呢d "最咩最咩" 的獎座, 又要玩一餐, 但買就...NO喇....

又係向左行, 因為對右邊的"Hollywood"無咩興趣...見到MADAGASCR, 不過呢個未有得玩喎....

咁玩BB級遊戲, 旋轉木馬啦, 好繽紛好得意....

玩完出o黎就見到全場最勁的過山車, 有開架.....

家姐仔去玩小型過山車, 我同妹妹去後面準備影家姐時見到"史力加", 佢剛同遊人影完相去休息, 見到妹妹望住佢便伸手俾妹妹, 點知妹妹淨係傻笑無同隻怪物握手....

費安娜公主就同妹妹Say hi!  .....

大少倍家姐仔玩, 尾3個卡就係佢哋, 家姐玩完話妹妹一定唔敢玩, 都唔太bb的喎! 佢就自己再玩多幾次....

妹妹話想睇多次4D, 於是又返去城堡....

費安娜的父母....

睇完就行去埃及區....

叫家姐仔玩MUMMY的室內過山車, 她在香港都會玩Space Mountain, 但佢話好驚d木乃伊唔想發惡夢唔玩喎...., 見人家玩最激的過山車, 尖叫聲已令人緊張, 家姐仔又未到呢個程度....

再買紀念品到關門便準備去晚餐, 外圍有幾間不同牌子的糖果店, 又要shop吓先...

行咗一圈唔知食咩好, 大少話想再去foodrepublic試埋其他地道食物, 於是3度去Vivo City, 坐monorail都好方便啫!  今次食虾麵, 專登影低係因為個湯底好好味, 好濃虾味, 大少仲encore淨湯, 老闆見佢咁欣賞加咗幾塊魚旦俾佢添  ....

非常充實的一天, 完全無中途返過房, 我哋對腳都又痛又攰! 呢兩隻就係家庭新成員, Allie Bear & Daisy Rabbit...

將d臭豬變番乾淨同香噴噴, 咁又過咗一天lu....