7月23日 (星期一)
雖然酒店就o係Wing Bay Wall Outlet旁, 但我們選擇再去行多陣堺町通. 午餐後便去白之戀人整餅。 小朋友見到花園有好多唔同嘅屋仔已經玩到唔肯走, 其實大人見到都開心, 就讓她們扮鄰居玩個夠吧!
玩咗成個鐘就去整餅喇。 由於她們尚細, 工作人員提議她們只係玩在餅上畫畫, 然後拎去焗。 在等餅期間就去咗整相片餅罐, 好值得整啊, 希望有機會冬天再去整個冬日版
行程嚴重拖遲咗, 本想食個Tea先再起行, 但真係唔得喇! 因為仲要去圓山動物園啊! 這個動物園不太大, 但都有北極熊, 企鵝...花時間也不太多, 最留得耐緊係遊園地那部份啦!
那時的小妹妹最鍾意玩呢類車車。
玩到關門便回薄野, 在Robinson的涮襌食壽喜燒, 都好好味, 而且又安排我們坐個室, 可能怕小朋友嘈到其他人掛
跟住3晚就會住新札幌的Sheraton。
7月24日 (星期二)
是日行程, 先去定山溪的佐佐木果園摘車厘子。 果園都幾隱蔽, 搵唔到便入了定山溪View酒店問路, 他們好好人俾埋地圖教我哋點去。 在經指導之下終於去到果園, 好多車厘子啊, 不過靚的一般都在比較高的樹上, 要大少扒上去先得呀! 車厘子好清甜, 除咗家姐仔, 大家都食到好飽啊!
o係果園食埋晏便去丘陵公園玩喇, 公園好大, 我哋只係去咗兒童谷, 小朋友又可以盡情跑跑跳跳, 完全進入忘我嘅地步...真係連阿媽都唔認得!
呢個繩網, 家姐仔最愛 (箱根都有一個), 以後去呢類公園都會問有無得玩繩網。 如果大家知日本那裡還有, 記得通知我啊!
小妹妹見到水水即刻除晒衫褲走落水喇, 因她見到日本小朋友都係咁, 成班小白"豬"好可愛的, 家姐仔算比較大了, 自己都怕醜唔肯除衫呀!
玩到六點關門先肯走, 小朋友一邊行, 一邊話出年一定要再去玩, 所以08年暑假又去呢樹。 其實如果有機會去札幌雪祭, 我都會再帶她們o黎玩冬日遊戲啊! 之後去薄野"冰雪之門"食晚餐, 好一般而且相比其他(呢幾日幫襯的)食店, 呢間服務唔係咁好。 住新札幌真係唔太方便, 食完晚餐小朋友都好眼瞓, 一上車就變晒睡公主, 自駕都好些但都要成半小時車程, 如果係要再坐JR就幣喇! 這樣開開心心又一天了
7月25日 (星期三)
今日我們山長水遠去咗登別Nixe水族館, 第一次去北海道就係咁傻, 編行程唔係咁妥善。 由於我哋唔係行高速, 沿海灣行好舒服, 不過就成3個鐘先到。 去呢度最主要係為咗睇夏天都有的企鵝巡遊, 不過當日真係好熱, 巡遊改咗做樹蔭下散步, 好近距離的, 企鵝家族好可愛, 可惜亦好快要返入室內lu
Nixe的地標城堡水族館, 可以摸海星啊! 雖然呢度唔大, 但唔知點解都可以hea到關門? 又去唔到登別其他地方, 大少話咁遠專登一到好似好浪費時間咁, 我心諗咁hea法去邊都一樣啫 回札幌行吓, 食吓, 買吓就差不多結束北海道之行啦!
7月26日 (星期四)
早餐後我們先到附近的超市買小妹妹的尿片, 因她當年3歲半, 睡覺還會瀨尿尿, 但還有兩天的東京行程啊! 順便逛逛酒店附近。 Sheraton大堂有個結婚用的教堂, 都好靚吓, 我們走時剛有新人準備行禮。
在千歲內陸空港坐日航去東京只要個多小時, 話咁快就到啦! 在成田再坐廸士尼的Shuttle Bus去Disney Ambassador Hotel。 呢間酒店好似香港的Disney Hollywood Hotel, 不過就有卡通人物駐場的餐廳。 這裡氣氛好熱鬧, cast member會成日帶領唱歌, 老實講近乎嘈吵 食物水準還好吧!
卡通人物比香港的落力, 隻鴨好矮吓, 好可愛, 小朋友最鍾意佢個pat pat同肚dum
老闆出o黎打招呼呀! 而Pluto同小朋友玩得最投入。
睇吓, 同妹妹玩到癩晒, 通場跑!
其實我唔係咁"好"有卡通人物嘅餐廳, 好阻住食o野
又要玩又要影相, 太忙喇! (P.S.就算你已經book位, 但因為都好多人, 所以一樣要排隊等位, 無book等都唔俾呀!) 食完就利用酒店包的monorail tickets坐吓日本版車車, 睇吓廸士尼周邊夜景, 再去Ikspiari逛咗一陣就返酒店休息了。
7月27日 (星期五)
由於今日會入樂園玩, 所以昨晚已在Ikspiari買定早餐, 希望在房內速吃可以早些入園玩。 可惜今日非常之熱, 一早入園見個溫度顯示有39度, 死未! 真係有被溶掉嘅感覺, 十分不好受! 我們先去玩些少人排隊的遊戲如木偶奇遇記, 白雪公主..., 再去店舖行嘆冷氣。
小姐們當年都仲只係識睇糖果類物品, 依家選擇嘅種類範圍就大好多囉!
本來經過Toontown時都想去玩吓, 但越晏越熱, 而且妹妹兩歲時在香港廸士尼酒店都試過熱到發高燒要叫白車去醫院, 所以怕會再出事, 於是決定先返酒店休息, 等傍晚再入園吧! 小朋友因真係自己都話熱到着火, 嚷着要走呢! (雖然好難得取到小熊維尼fastpass, 也放棄了!)
我們基本上係濕透, 趕快回酒店喇! 可能出咗太多汗, 兩位小朋友都好攰要午睡
待嬌陽歸家我們便再入園, 雖然都係悶熱但已經好好多了, 在Toontown玩個暢快, 看看美麗的閃燈花車巡遊, 又一日喇...唉! 其他咩land都無去! 所以我們決定一定唔會再暑假去東京廸士尼!
7月28日 (星期六)
今日要返香港喇, 為咗滿足小朋友, 早餐又係去有卡通人物的Chef Mickey。
同老闆娘say goodbye! 日間除咗有夜晚出現過的公仔之外, 仲有香港無見過的Grandma Duck添!
之後去泳池玩水。 呢間酒店唔係提供救生衣, 那對"手袖"唔係好安全咁, 妹妹點都唔肯落水"鉗"住大少!
搞咗好耐先肯同家姐仔去淺水區玩。
只係晒一陣都黑咗, 而且要趕快梳洗退房啦! 小朋友好唔捨得走, 家姐仔影完呢張相仲喊添! 直到返到香港失落情緒依然未退, 我們答應她好快再去先慢慢正常番咋! 
都未見過佢咁嘅?! 可能第一次去玩咁多日又咁開心, 一下子玩了未適應掛!
沒有留言:
張貼留言