2012暑假有老有嫩去九州 ~ 第六天

八月二十四日 (星期五) 天晴 > 雨


住呢間酒店都係為咗可以一早去呢個Space World, 打開窗簾就清楚見到成個park。

 

昨晚黑蚊蚊睇唔清小姐們都已經嚷着想玩, 今早就更加想飛過去啦!

但都要食埋早餐先得!  在某funtion room間出來的早餐區, 食物種類都可以, 比昨晚的好。 嘻!　兩位小姐動作有時都好一致吓.....

呢個好笑, 在洗手間有埋漱口水, 好細心喔! 幫襯吓先.....

酒店有Shuttle Bus 去樂園, 只有兩班早上九點幾去, 兩班旁晚六點幾返。 其實轉個彎就係正門, 不過行都要7-10分鐘。  爺爺今日都有同行, 但就預咗只留半天, 所以玩完一陣過山車, 就先倍他看看太空電影, 但好悶, 返香港太空館睇好過!  呢款家姐玩咗兩次, 她和大少在車上架, 妹妹唔敢上, 自己去玩輕量級些的過山車....

呢個入咗個隧道好剌激喎!

早上玩完一輪, 同爺爺在園內拉麵店食午餐後, 他們就先回酒店休息, 我們就繼續玩埋其他遊戲。 玩這個遊戲時, 兩姐妹同一時間分別在唔同的水道衝落o黎, 真係夾都無咁啱, 妹妹在旁邊另一條小朋友些的水道滑下, 我影唔切!  不過俾家姐激死, 扒係度點影呀! 我乾煎咁耐等影你真係嘥氣!  早知影阿妹....

好熱, 入室內過冷河, 又扮吓倉鼠.....

呢間就係我們住的酒店, 在對面架咋!

機動遊戲都玩得七七八八, 有兩個高呢的過山車無大少倍玩, 家姐唔肯試, 咁去玩水囉!



遊戲具全景.....

呢個水池和水梯係為年紀小的兒童而設, 兩位到此一遊就算了.....

今日主打係呢條七彩天梯, 好好玩架, 5人一齊滑下, 有計分器睇邊個最快

玩咗兩個多小時, 我想走(我好悶),  而且沖埋身都差不多黃昏。 於是家姐幫手拉阿妹上岸.....

我們坐的士去另一邊的Aeon Mall, 由於爺爺不在, 一致決定食壽司.....



呢間壽司店係用新幹線送特別order的壽司俾你的....

食完滿足的一餐, 三女子又行吓街街lu。  我好鍾意呢間家品店, 去親各地的Aeon Mall都有少少收獲。  不過其實都唔行得耐, 小姐們玩了一天, 小宇宙都用得咁上下, 又坐的士返酒店吧!  由於離酒店其實幾近, 那個的士大叔唔太"老黎", 碎碎念了一陣先開車! 大叔, 你轉個彎就有千幾yen, 港幣百多元架, 去到酒店門口又有客喎, 都唔知有咩咁不滿?!  如果唔係黑蚊蚊又攰我都會行啦!  

再浸浸溫泉又一天了!



 

2012暑假有老有嫩去九州 ~ 第五天

八月二十三日 (星期四) 天晴 > 雷雨

第五天....好似過咗好耐, 但又無咩特別地方去過.....而且今日係全程最倒楣的一天!



這間就係五輪, 好似係旅館唯一的食堂.....



佈置都幾雅致, 被安排坐在近玄關的位置....



從最入的角落才可影到餐廳全景.....

印象中食物的水準都唔錯, 但可以揀的唔算多.....

o黎到熊本都有些想行吓熊本城, 但兩位男團友無興趣, 我一個人行都得架, 不過兩位小姐話反正都要在房悶不如跟我行吓喎!  其實旅館一出就見到熊本城, 我們三女子向住這方向行, 以為都好近, 點知原來要兜去入口都幾遠, 戴晒遮光罩都仍感到紫外線的強烈。  行到去入口, 唔知點解三人都唔想入喎!  對話: 入去做咩? 睇熊本城囉! 一路都睇到咯, 睇咗囉! 你哋未入過日本城堡嘛! 電視睇過個d呀, 無興趣喎!....就係咁行返轉頭, 出o黎晨運同運桔!  反到上通d舖開始開門, 呢度大家都好有興趣, 咁行街囉!

叫做滿足咗少少購物慾又係時候會合男子組走啦!



由於我哋架車高身, 入唔到停車場, 職員話就咁泊都得....

安排往北九州中途去鳥栖季樂食晏, 先試三款不同的牛, 結論係我們這一家唔可以食頂級的牛, 脂肪太多太膩, 我們要食瘦肉, 而且發覺基本上和牛瘦都好重牛味, 唔會差得去邊, 追加平靚正的上級牛吧! 

此時正午, 架車晒到無影!  又出發lu....

今日去海之中道公園, 本來打算大少倍爺爺行公園, 我們女子組去水上樂園, 但他唔晒得又唔行得耐, 公園咁大無得唔行, 於是決定分組行事, 我帶小姐們去玩, 大少同爺爺去行附近的Aeon Mall, 起碼有冷氣又可以去食拉麵。  入呢個水上樂園都幾麻煩, 先要行去正門入口, 再轉Shuttle Bus....

搞一大輪終於可以落水啦, 拎住兩個私家水泡浮板都幾麻煩架....

呢度只係水上樂園的一小部份, 這時雲雖然厚但天仍是藍啊!   我就攬住d毛巾呀, 遮呀咁, 坐在對面草地等女。 突然見遠處有大團黑雲向這邊飄過來, 唔駛10分鐘雷雨殺到, 所有泳客都要立即上水, 妹妹正在水中央, 家姐同救生員哥哥立即去救佢, 氣氛好緊張, 大家都跑去小食亭外的帳篷避雨, 雨勢好大, 此時應該有香港的紅雨。 見有排落我就去買些東西給她們吃。 雨越落越勁, 大家開始擔心, 而且好凍, 我已經將大毛巾包住小姐, 但真係凍到震, 她們濕了身又只穿泳衣好易病, 我唯有除下外套給她們同攬實保暖。 又突然一陣強風刮過o黎, d椅呀, 食物呀(對面小妹妹的拉麵)都被吹到跌晒落地, 連環的大雷電就在眼前, 好恐怖, 這時係黑雨加8號風球, 小朋友喊聲不絕, d日本妹又呱呱叫, 好似打到o黎咁, d風雨兜口兜面拍過o黎, 我就攬住兩個女同用我瘦削的身軀去遮住佢哋, 叫佢哋唔駛驚但自己好驚...等到雨稍為細少少就快速跑去對面的更衣室走人啦! (其實好近十米都無)  一窩蜂咁換好衫又一窩蜂咁去坐Shuttle Bus, 好唔容易先返到去公園正門, 遮只有一把, 要用埋個浮板快步跑返去海之中道的酒店等大少。  早咗成個鐘, 諗住打電話/ whatsapp 俾大少, 又唔知點解唔得喎, 酒店大堂都無wifi? 就係咁呆等了一小時多, 終於上到車.....




直去今晚的酒店, 北九州八幡Royal, 塞吓車到達已經七點半, 要趕快check in, 因他們的晚餐最遲要八點入座, 又夜又落大雨唔想再出去揾, 唯有梗食!  呢餐影都費事, 又貴又難食又無野揀, 飽咗就算!  有興趣可上他們的網睇吓咩叫鄉土料理自助餐吧!  (睇相好樣好多) 食完返大堂見到有小手作, 小姐緊係唔放過啦!  

返到房床已準備好了....

我們三位女子的房。  臨瞓前, 先去浸浸溫泉, 大浴場幾多人無可能影到相, 而且今日已經無mood影相了!



這就是小姐們的傑作.....

2012暑假有老有嫩去九州 ~ 第四天

八月二十二日 (星期三) 天晴

食早餐的地方同昨晚一樣 , 都算多款式選擇。

先o黎包包類....



少量肉類....

最後o黎個日式, 非常飽的一餐。

食完早餐又係時候執包袱走啦!  原來呢間酒店10週年, 10年咋咩?

昨天去泳池經過, 小姐好想入呢間虫虫館但趕去玩水無入, 今早點都要臨走前去喎!  呢張相似唔似有兩對孖女呀?

其實只係睇呢隻虫....

見無落雨同爺爺去行吓公園。 附近就係青島兒童王國, 經過公園湖邊見到真假黑天鵝, 有趣....

呢日唔止無落雨, 仲超晒, 行去公園另一邊, 淨係呢段路, 我們的肩膀都晒黑了.....



又有小屋子, 小姐雖然已長大不少, 都要入去坐吓, Doll House類始終都係女孩至有興趣的玩意....

終於行到過o黎, 如在這酒店住行出o黎就玩得.....

小姐們緊係唔係想坐天鵝船仔啦, 又要玩呢個呀!

又有兩隻倉鼠, 步伐好齊咁起勢咁跑....



但好多時都平衡唔到, 一仆一碌....

夠鐘被大姐姐拉返埋岸, 玩完! 

跟住過旁邊的彈床區, 那個露天彈床已被晒到可以煎蛋, 小姐上去跳一下已經要落返o黎, 另外兩個又焗到死, 玩唔夠5分鐘放棄lu....

離開公園便去今日(其實係去宮崎的目的)的重點, 日南海岸海鮮BBQ店, 全團人都好想食, 所以第二天在太良見到蠔小屋唔入留返今日。 點知.....唔係呀! 休息, 明明唔係今日休息架喎!!! 唔好玩啦! 但係行咗小店成個圈都係重門深鎖, 唉!  於是都要面對現實去揾其他野食, 有些磯料理但我睇過餐牌無咩o岩爺爺, 咁唯有去揾拉麵類啦!  順道加影鬼之洗板, 只係到此一遊!



決定入呢間.....

都係無咩好揀, 有烏冬.....

同烏冬....那些伊勢海老湯同set係晚餐先有喎!

好本地的小店, 老闆娘好nice的, 我問她有無其他BBQ海鮮店在附近, 佢都係話日南海岸那間, 不過佢好老實咁話係遊客食的, 好貴, 唔去無損失喎!



帶住超....失望的心情去熊本, 由宮崎去熊本都幾長程, 大家又要眠一眠。 大少話架車都幾重, 在公路上行成130-140, 要揸到個軚好實好用力, 所以都幾攰!  又係行好多隧道的路, 我唔敢瞓怕大少會悶到瞓着, 要幫眼睇路。 呢間和数奇就係在熊本棲身之所。
 


要在地下乘電梯自己推行李上1樓check in。 由於大少要泊車, 我就負責推行李, 點知上到1樓出電梯時, 其中一隻轆"kick"住, 我成個人失重心跌倒衝埋牆, 嚇死所有人, 職員拿拿林走過o黎幫手! 都幾瘀架!  我們的401, 402號房。

我最喜歡係木地板, 而且房間佈置幾有民族特色, 床又夠大又舒服, 推薦的住宿。



我影相的位置晚上會加多一張tatami俾妹妹, 大家都好喜歡呢間房架.....

浴室就好企理, 左手邊係浴缸, 右手邊係厠所....

 

小休一會, 要落街揾食啦! 本來訂了在旅館的"五輪"食晚餐, 但都知應該唔合爺爺口味而且又幾貴, 所以一到就取消了。  呢間旅館的位置好方便, 一落街就係上通, 見到上面的酒店指示嗎?

見到寵物店, 小姐們二話不說就入咗! 仲想帶呢隻貓貓返屋企喎....不過佢真係幾可愛。



一路行, 一路睇食店的餐牌, 好多都唔啱爺爺, 而我哋唔想又係食拉麵, 於是好努力咁揾.....

睇到食店在1樓外牆的圖片好似幾好, 我先上去睇吓咩環境同有咩食, 見似乎可以便叫團友上來。 叫咗好多送啤酒的小食, 咁啱是日啤酒半價, 啱晒兩位男團友, 最好味隻雞亦, 好味過名古屋名物, 唔係講笑, 真架!  要追加呀!

間小店係由一個青年打理, 全部一腳踢, 係有些食物咸少少, 但整體唔錯架! 我走時仲讚佢"勁", 搞到佢面都紅晒....

食完晚餐爺爺已經好攰, 雖然其實今日都唔係好勞碌, 咁大少就倍他早點回酒店休息, 我們女子組就去行街同打機lu!  YEAH....不過好多舖都開始關門, 唔可以行好耐, 返到去又係歎吓個溫泉先....

唔知點解呢個旅程大部份時間溫泉都係無人, 唔通真係夏天嘅關係??!! 仲好, 包場慢慢浸, 成個人鬆晒先去瞓個靚覺!