2010快閃倫敦賀Les Miz 25th Anniversary - Day 3b

North Greenwich係一個比較新的站, 有點像香港機場線。 一出已見不少人從O2方向行來, 原來日場剛完(日場係後加的場次), 觀眾正離開...這便是O2的外觀, 影唔晒添....

大少先去取票, O2有3萬多個座位, 已訂票的觀眾要跟名字去不同的窗取票...

好有紀念價值的門票啊! 從未試過攞到"飛"會咁開心....

我影O2, 大少影我....看見遠處escalator下來的人群嗎? 3萬幾人好似散極都散唔完咁...再加上好多夜場早到的觀眾(包括我哋), 同見有好多音樂會的工作人員出o黎揾食, 成個Mall真係"people mountain people sea..."

見咁嘅形勢, 快d去餐廳那邊睇吓食咩先。 基本上所有餐廳都排晒隊, 而呢間壽司店相對"少"人, 我哋又想食日本o野喎, 就呢度落腳啦! 好彩我話早些o黎又好彩早5分鐘排隊咋, 遲少少條龍尾都唔知去咗邊啦....

好西化的壽司店, 個座位設計好奇怪, 坐枱的係要搭枱, 排到我哋時係4人枱, 侍應問我們介唔介意同後面的母女一齊坐, 緊係唔介意啦, 但那位女士就有點介意, 不過佢介意都無辦法, 唔坐你重有排等呀....

好多西、日配搭的鬼佬壽司, 唔好食只係好過無, 但外籍小妹妹對那些甜蛋壽司已大讚好味...由於不合口味(同香港的水準有段大距離, 同日本更加無得比), 我同大少只食咗5碟便埋單走啦, 破晒"少"嘅記錄呀!

還有大半個鐘, 去買紀念品先, 那些紀念Tee有紅, 白, 藍3隻色, 一路排先係無晒藍色, 之後連紅色都無埋, 只好買白色了。 綜合3次的紀念品, 就係都無咩design, 如果在日本就一定又靚又多選擇, 就係無咩好買先買好"行"嘅Tee, keyring, 當然唔少得souvenior programme...

咁多人早些入場啦又要security check....入到去原來有其他merchandise booth, 大少幫我買到紅色tee呀!  yeah....

一入到場館就已心跳加速, 越行近舞台情緒就開始高漲。 見到上面的orchestra, 那些燈的裝置, 萬分期待啊! 心裡暗叫: 真的嗎? 我真的在現場嗎?

前排的位置在平地上, 看演出會辛苦少少特別係我哋較外國人矮, 不過坐斜上的座位又太遠了, 音樂會不同音樂劇, 而且場地咁大要近先睇到啊!  幸好個舞台整得幾高, 視線都可以啦! 睇吓, 坐滿晒真係好震撼呀!

大會先係播放一段TV Promo的片, 大家已拍手掌, 當音樂, 燈光同各國電視台的cameras(資料話現場有1000部各國的cam)一起,  不得了, 真係未睇已勁興奮(有興趣看片段可上Youtube, 已有好多人upload咗)....都係o個句, 見人影我先影咋, 而且係我同大少都好鍾意嘅Lea Salonga出場啦。 今次她做Fantine, 不過我同大少都覺得她做 Eponine比較出色, 她演Fantine兇了點, 連Lea自己都話有次唱"One Day More"時, 自己明明係做Fantine卻唱咗 Eponine個part...做Javert的Norm Lewis演出一樣精彩, 大少最愛Javert的"Star" 同"Soliloquy", 他演繹得好有水準....

學生領袖Enjolras由Ramin Karimloo飾演(之前已提及), 他的歌聲好好聽, even係cocnert都做到那種激昂, 完全交到戲....

臨完上半場前的"One Day More", 所有演員加上後排那陣容的choir, 整個場館震撼到真係要親身感受, 唔知點形容好, 台上有500多個人呀, 世紀音樂會比上次10週年重要多人...所以我一向都話無任何樂器比人聲更好聽....係會感動到心的!

下半場啦, 主要想講吓男主角Marius。 說回上半場開場時見到他出場, 我立即好驚訝地問大少: 點解佢咁似Jonas嘅?! (如果屋企有Disney Channel就知我講緊嘅係Jonas Brothers 的Nick Jonas) 即刻睇吓場刊, OMG真係Nick, 佢把聲好雞仔o個喎, 點會係佢架!!??? 果然, 他用唱pop song嘅方法去演繹Marius雖然serious, 相信佢都自知唔係musical voice, 唯有用他一慣的唱法...上半場時真係俾佢激死, 自己唔夠聲又離支咪成尺遠, 靚仔呀, 完全聽唔到你唱咩喎?! 你估你把聲好雄壯咩!! 相信在中場休息時他在後台俾人"提醒"過, 下半場明顯行埋支咪同更用心唱....好又到我的最愛"Empty Chairs Empty Tables", 佢一唱:there's a grief that can't be spoken....", 嘩! 最會"唧"我喊的歌我無反應喎! 一d都feel唔到grief....不過公平的講睇得出佢好盡力啦, 錯不在他, 係揀佢的人點解會揀佢呢? 到依家呢個謎我都未能明白。 我影底佢係因為兩位小姐睇Jonas Brothers, 影俾她們看的, 點知返屋企同家姐仔講Nick唔係好得, 她說: 車! 佢都唔係主音, Joe先係呀麻, 梗係唔好聽啦..." 哦! 原來你鍾意o個個係Joe, 不過Nick靚仔d喎!....

至於兩位女主角, 先係演Cosette的Katie Hall, 她演得不錯聲音亦好甜美, 而且佢個樣真係好似Les Miz個logo公仔咁, 大少話佢好似公仔。 她一同Nick合唱就蓋過晒男聲...

而做Eponine的Samantha Barks, 佢唔能夠準繩地撑握Eponine的神緒, 和Nick唱 A Little Fall of Rain時, 兩個一碌木咁唱, 劇情係Eponine中槍臨死時在 Marius懷中的一幕, 佢兩個好似唔識咁, 眼神無咩交流, 完全無交戲俾觀眾...真係懷念Lea Salonga同 Michael Ball的感人演出...

一路去到後半部份, 最能跟觀眾打成一片的"Master of the House"就最好玩, 幾萬人一齊打拍子, 搖晒身, 好enjoy呀!  尾聲finale時唱到"...take my hands, I lead you to salvation, take my love, for love is everlasting.  And remember, the truth that once was spoken, to love another person is to see the face of God!...Do you hear the people sing...." 全場已站起來一齊唱.....相信一生人無幾多次可以感受呢種共融的震撼....

謝幕時分別介紹不同年代的Les Miz company, 先係Queen's Theatre的但俾人阻住咗影唔到, 然後2010Barbican Centre最年輕那班....

登!登!登! 壓軸係1985年Original Company, 有Colm Wilkinson, Michael Ball....大件事不得了, 真係掌聲如雷一發不可收拾....少不免緊係要獻唱啦...Les Miz Dream Cast。

在大少身旁的女士一見4位Jean Valjean一齊唱就喊到 "fee lee fair lair", 我都有喊但就無咁誇張囉!  Sir Cameron Mackintosh 話如果再25年後慶祝50週年時他已90歲, 希望真係可以有呢日"I might not be here, but the show is here!"  我同大少都約好25年後仲行得走得, 一定再o黎...

放晒煙花紙炮, 大家的情緒已到亢奮地步, 好留戀唔想走咁....

望住Colm Wilkinson的背影消失後, 先肯不捨地離開.....

大少比較清醒, 他拉着我快步走, 點解?...佢話之前日場散時你唔記得幾多人喇, 幾萬人湧去坐tube呀, 仲唔快d走.....嘩! 真係走得快好世界, 返到Tottanham Court 好多要轉線的人已經無車, 因central London的車已停駛.....(其實我哋都係第二日臨去機場先知地鐵由那晚開始罷工, 當時都奇怪倫敦地鐵咁早收?!!)

酒店附近的地鐵出口就係呢個Theatre, 做緊"We Will Rock You", 在香港睇過所以咁近都無去睇....

這兩天的紀念品, 中間那件係燙上銀色的.....

Les Miz的歌曲成晚在腦裡, 直至睡了夢也是這兩天的情景.....我同大少都覺得好值, 好彩決定o黎, 如果唔係會一世後悔....