7月26日 (星期一) 天晴 > 天陰
古川的早餐雖然選擇唔係話好多, 但就幾有水準。 餐廳在2/f, 在休息室旁。一邊放西式食物, 一邊放日式。
擺放出來的份量不多, 但經常更換新鮮的出來, 我不喜愛的日式煎魚(早餐常有的那些)都唔錯, 所以食得好滿足! 而最大驚喜係我兩位小姐竟然係免費, 老實講我預咗要另外付錢, 因她們又唔係幼兒一般都要喎, 所以呢間酒店好大方
再加埋呢個無敵運河景, 輕輕鬆鬆咁歎個靚早餐! 推介,推介!
呢排位好搶手, 有對日本男女因堅持要坐呢d位, 同工作人員擾攘咗一陣。 當時心諗, 無咪坐住等囉, 唔通叫食緊嘅人走咩! 呢張相係我們hea到其他人走晒影架
走咗出露台影運河, 其實有時間坐係度歎杯咖啡真係唔錯架!
不過我哋就另有目標, 就係着和服行街街啦! 雖然款式選擇唔多, 但件件都好靚, 可惜家姐仔同我的和服都偏大, 有點不稱身。
妹妹的那件就好o岩身。 呢間酒店住客租和服大人只係500yen而小童就300yen, 好抵玩啊! 不過幫手穿和服的姐姐就無一般溫泉旅館的大嬸咁專業, 搞咗好鬼耐。
等小姐們時, 影吓相打發吓時間。
酒店每個角落都好古典, 很喜歡。
我本來打算着住和服去埋舊手宮線影相, 但搞咗太耐小姐們已有點唔耐煩, 出到街又熱 (因我們和服內係着住自己衫無除下的), 於是只在運河旁影些相便算了。 以為大少影緊小姐未到自己, 欣賞運河之際俾大少偷影咗! 都好, 有幅"我的倩影"相
我哋好明顯唔係日本人, 但就俾遊客當紙板公仔咁捉住影相, 小姐們更加覺得奇怪, 不太喜歡想快些換番衫喎。 好不容易要她們企o係呢個必影點完成呢個媽咪要玩的遊戲, 多謝俾面
從站姿應該感覺到她們好唔願意
嘩! 可以走她們就一支箭咁行番酒店。 有無發覺我哋無着日本屐, 本來有的但好鬼難行, 因為係傳統木o個種, 小姐們梗係睬我都傻啦! 不過我都行唔到放棄咗!
換番衫就要走喇! 呢間係有機會再到的酒店, 再見啦!
今次o黎小樽有三個目的, 1) 小樽潮祭; 2) 三角市場食海鮮; 3) 食七彩軟雪糕。 所以下一站就係...登...登...登, 三角市場。
來回行咗市場兩次先決定到去間有齊想食的海鮮舖坐下。 牡丹蝦, 無想像咁正, 但都算好好, 連妹妹都夠膽食(會郁架), 重愛上咗添!
我最愛螺剌身, 好鮮甜。
生蠔就好清, 無咩味, 有些失望, 可能唔係"當造"。
八角魚, 初入口就好淡, 又係無咩味, 但鮮味漸漸地在口腔很久都不散去, 好特別。
花咲蟹, 當然係鮮甜無比啦! 仲有小朋友的飯+蟹湯set, 真係好飽啊!
去埋北一哨子3號館滿足埋第三個願望之後, 便出發去手稻Pool啦! 天陰陰, 其實幾凍吓, 小姐們凍到DeeDee震, 不過有得玩咩都唔理喇! 呢個係小姐們好想玩的, 但竟然只限幼兒唔俾佢哋入, 兩位有點唔開心, 但好快,真係好快就去揾其他o野玩。
"Dom"一聲就跳咗落流水pool, 跟住水流係咁飄又得, 自己游又得, 得咗!
又去玩吓沖浪。
家姐仔玩呢個水梯有笑話一則, 話說呢條梯係唔俾用水泡之類的東西, 但家姐仔sir到落底先醒起自己唔識游水, 又唔知水有幾深, 於是坐o係梯口死都唔肯落水, 工作人員示意她落水, 佢就唔知點算, 其實當時有另一女孩站在水中, 水深只及大脾, 但家姐仔太驚睇唔到, 終於要兩個工作人員"請"佢落水先知自己好瘀
我就即刻打蛇隨棍上話: 嗱, 唔肯學游水就係咁喇!
後來租隻艇"遊船河", 不過沒有太陽真係好凍吓, 妹妹凍到手腳紫紫哋, 怕她們病就叫大少捉家姐仔上水走啦!
離開手稻便去期待已久的宏樂園, 想早一點到歎個夠啊! 一入房第一時間去睇吓個風呂, 真係好正喎!
又係"爽死"時間, 今次再加多句 - 好歎呀! 這兩天共浸咗四次呀!
浸完溫泉無耐, 酒店嬸嬸就送上豐富晚餐。
我們訂的是"旬之夕食", 但沒有想像的震撼, 不過都好新鮮同好味, 食晒真係好飽架, 加上食埋兩個女個份。
食完晚餐稍為小休, 梗係又浸個無敵溫泉啦!
這晚, 大家都瞓得好甜, 好舒服! 又係大滿足的一天!
手稻Pool Tel: 0116-82-6588
宏樂園 Tel: 0134-24-6051
宏樂園真係好回味呀，始終係要豪一次既！
回覆刪除手稻Pool都係小樽架？下次有機會去下先。
[版主回覆08/13/2010 14:04:00]似乎大家對宏樂園都回味無窮喎 手稻Pool唔係在小樽的, 係小樽同札幌之間, 下次順路就記得去玩吓啦!
古川及宏樂園都好似唔錯喎，有機會要去住下先，不過我記得小樽的房價都唔平架 !
回覆刪除[版主回覆10/07/2010 20:42:00]兩間都真係好值得推介的住宿 小樽係熱門旅遊區房價當然唔會平得去邊lor!
宏樂園既房間都設有私人風呂嗎?? 著和服出外影相又真係幾特別...點都要一試ge
回覆刪除[版主回覆03/06/2011 21:49:00]不是啊! 其實大浴場都唔錯架, 不過我們想一家人一齊浸咪租風呂房囉 ! 你好似新婚喎, 咁兩夫妻租私人風呂房都好合適呀!
如想租和服又唔住古川, 可在出世廣場2/f 有得租的, 大約3000yen一小時, 如有旅遊書小樽地圖有出世廣場的。
唔 . . .唔 . . . 宏樂園我07年住過, 當時感覺好正, 無論風呂, 風景, 多食同service 都得 . . . 但最近兩年, 多咗香港人嘅評語系夕食 麻麻 . . . 甚至唔得 你地覺得點呀 . . . ok ? 還是可以 好d ? 特別系比系今次雪遊嘅幾間, 唔計"三余庵" , 我又收到話"三余庵" 夕食跟package 嘅唔得 . . .
回覆刪除[版主回覆03/07/2011 21:42:00]你咁問我又坦白些講, 當天我係有少少失望的, 因見早兩年去的朋友, 他們的夕食真係豐富到我睇相都嘩一聲, 但到自己時覺得不外如是, 而且我已經係選"旬之夕食"! 可能期望高咗不免有點失望, 但水準仍是中上的
至於三余庵在食方面...應該咁講, 可能之前睇多咗住過的朋友post的相同評價, 到自己時就少咗份驚喜, 但只係沒有太大驚喜而已, 食物的水準依然高! 不過, 如果可以好似軍曹先生咁, 料理長親自為他弄精選菜色, 就更加完美囉