2010暑假北海道悠悠閒之旅 - 第一天 : 小樽

7月25日 (星期日) 陰天

之前都有提到出發前太忙, 竟然連做網上登機都忘記咗, "咋咋林"做番都只有最後一個機艙先有四個連位, 心情大打折扣, 唯有安慰自己有得去都好開心啦! 

途經23號閘有個遊戲區, 雖然係適合年紀小的小朋友, 但兩位都唔放過要玩吓

準時到達北海道新千歲機場, 不過由於很遲先出到機艙, 過海關都要排咗個多小時 後來海關叔叔又搞錯咗少少o野, 於是前所未有地遲先可以去取車! 呢個新的國際線大樓好大, 好明亮。 出了關要再落一層去 Rent-a-car counter。

5時10分, 以前已經在札幌啦!  點解我明明係悠閒之旅, 但又咁心急呢!? 因為我們要趕去小樽睇最後一天的潮祭, 原本預計6時左右到, 希望可以趕得切睇太鼓表演啊!

第一次在新大樓取車, 先確認再等接駁巴士。

當天好像全車都係香港人, 大家打個招呼便開始各自精彩嘅旅程。

新國際線大樓的外觀。

7-8分鐘就到達取車處。

今次又係租Sienta, 呢個綠色大家都好喜歡

大少已經盡快直飛小樽, 但去到入小樽市的路口(近童話十字口外), 可能因潮祭有些地方封路好塞車, 塞咗成20分鐘先到酒店, 真係行路都到咗啦!  晚上的古川真係好有古樸氣氛 

地下的接待處, 我們在此先預約私人風呂時間。

電梯旁的精品店, 好多貓貓的造型飾物和擺設。

我們訂的運河側雙人房。 先放下行李便往潮祭場地。

成街都係人, 好多女仔穿美麗的浴衣, 氣氛好熱鬧啊! 人潮不斷從小樽駅湧上來!

可惜我們趕到時已經剛剛完了太鼓表演無得睇! 周圍有好多小食擋但人龍長到不得了, 就算買到食物都無地方落腳, 日本人就有晒準備坐地下啫。 於是氹已經餓到呱呱叫的小姐們睇一陣煙花就去食晚餐。

煙花無香港的大陣像, 但就好有特色, 可能係一個一個咁放先看到好多未見過的煙花。 本想睇埋去, 但俾兩隻小魔怪"哝哝哦哦", 我和大少唯有一邊行一邊欣賞。

沿運河行都看到美麗的煙花。

街頭小食, 有點似維園年宵。

終於去到"老友"極力介紹的 ~海貓屋, 夜晚搵都幾隱蔽o架!

呢個時候其他人仲睇緊煙花, 餐廳無咩人, 但煙花一完就"全院滿座"喇!

太肚餓, 食咗一半先記得影底這碟"老友"無介紹錯的蟹膏意粉, 正!

小朋友的茄汁蜆肉意粉都唔錯, 其他食物已在肚中, 影唔切啦!  

食飽飽就唔好阻人個位, 出去夜遊小樽吧!  埋單時收錢的應該係老闆。

佢問: Where are you come from?

我就話: Hong Kong!

佢: Hong Kong is good!

我: But I love Hokkaido!

就係咁, 佢收少咗我錢, so俾我! 事先聲明我講的都係真心架!

周圍都好有節日氣氛好熱鬧!

晚上的小樽運河 (好多人, 好趕咁影無人的一刻唔記得用閃燈)

入咗從來無入過的小樽食堂, 原來都有手信賣的。 花畑牧場呢期真係好紅, 去到邊都見到"她"的產品。

本想試吓出拔小路的屋台小店, 但店子小小又多人等位, 唔好意思嘥人家的位(小姐們應該唔會欣賞), 行個圈便走了。

行到差不多夠鐘便回酒店浸溫泉。 在8樓的私人風呂, 成為2100yen50分鐘。

一個室內, 一個展望風呂。 水溫唔太熱, 有小朋友/幼兒的朋友可以放心俾小寶貝浸, 我兩隻就唔使諗第一時間跳咗落水囉!

一人一個, 一齊話: 爽死囉! (學咗閃電王卡通的哨牙嘜), 大少即刻話: 爽你個頭, 俾番d位好喎! 好搞笑, 父女掙溫泉!

歎完溫泉成個人醒晒, 去咗2樓的休息室聽吓音樂, 睇吓書, 玩吓玩具, 坐吓按摩椅...hea到成12點先捨得返房瞓。 環境很輕鬆自在, 小姐們話好似o係屋企咁!

雖然睇唔到潮祭表演(原則上無睇過潮祭)有點遺憾, 但"唔緊要, 咪下次再o黎囉"呢個金句, 令我哋好滿足咁過了第一天!

運河之宿 古川 Tel: 0134-29-2345

海貓屋 Tel: 0134-32-2914