我們玩的時候, 大少已從酒店取車來Ice Land接我們走, 話俾o靚妹知下一站都有得玩先肯行咋! 由於道東道實行無料收費, 我們全程行自動車道。
準備這個旅程時看冬季地圖, 十勝清水至Tomamu一段係無咗嘅, 到實際時GPS去到十勝清水指示我們出十勝IC轉行國道, 我就叫大少唔好跟, 直行收費路, 因我見好多大貨車都行, 即係無封啦! 原來無顯示出黎呢段路好大風, 應該話好大橫切風, 都有少少危險! 基本上前面係白濛濛一片, 我幫眼睇路, 但大少話咁先似去咗北海道喎!! 
好啦, 見到Tomamu出口lu 
行高速公路真係快好多, 比GPS快成個多鐘....
上到Resort好明顯凍咗好多, 去到分叉路時停一停車看路牌, 之後竟然"死火", 剛有resort shuttle bus經過, 司機便找人幫我們, 好彩地大少在車頭搞搞吓又無問題喎! 真係唔知點解, 唔知大少講笑定講真, 話架車可能上到黎"冷親"! 
今次因為想方便玩, 於是就住Villa Sport.....
本來一早訂咗房, 但出發前幾星期有平plan出, 由原來3萬幾減至萬八日元, 就算我自己俾錢食晚餐都仲平過之前的, 所以好多謝Acacia的通知! 
不過就忘記Niseko2000的教路要求闊窗房(只係轉plan時忘記), 最後係間比較細的房, 算啦咁平! 睇吓, 一入房就快速除晒衫, 所以出入唔帶大袋點得呀....
基本上一眼睇晒! 快d換泳衣去玩喇....
熟口熟面的室內泳池, 小姐們: 沖呀))))))
幼兒波波池, 小姐們已經唔玩lu....
大少倍佢哋玩, 我就周圍行吓。 泳池最盡頭的茶座, 不過無人....
外面係白雪世界, 裡面係暖暖的泳池, 好有趣, 黃色大水泡個幾粒係我的團友呀....
從這行入暖水的池, 但無人入去玩嘅???....
水比較深, 小朋友一定要有大人倍同啊!
VIZ SPA的正門....
行完一周就入去浸溫泉。 呢張相係我浸完走時影架, 本來入黎時想帶相機出溫泉影, 我用大毛巾包着相機諗住有機會就影, 但太多人計劃失敗, 我就唯有只去浸啦, 一攞條毛巾架相機就應聲落地, 慘啦, 新買架! 好彩只係花咗少少 
個刻我自己鬧自己做賊又唔記得自己係賊, 死蠢!
玻璃門出去再行入少少就係溫泉, 好大水氣基本上咩都睇唔到, 就算有成7-8人一齊都只係聽到人講野唔係好見到個人....
我帶小姐們去梳洗時就輪到大少去嘆吓! 在大浴場沖涼方便過在房呀 
換番衫就去Ice Village lu! 呢張相係從Villa Sport後門外影的, 對面就係VIZ SPA, 向左行就去Ice Village, 係咪好方便呢....
都預咗個Ice Villlage無官網咁靚, 但真係差好遠呀, 呢張相係我影咁多張最光最見到野架啦, 本來想去小店買煙火玩, 都無人嘅....
遊人集中晒係冰屋入面, 好多講國語的人, 又"呀咋"又嘈, 所有冰屋外的位我都爭唔到黎影呀 
入到冰餐廳真係有人食野, 但我哋呢班"戍李"遊客個個都係入去影完相就走, 老實講都好騷擾, 所以都係"嗱嗱淋"影完就走啦....
入到去整冰杯的地方, 小姐們好想玩, 但我好清楚知道佢哋一定唔夠力, 所以最後會係揾大少笨, 佢緊係睬兩位都傻啦....
嗱! 睇吓好啦....
呢個Bar位我排咗好耐先快影到咋, 如果少人d我從有光源那邊影應該靚少少呀...
之後去埋冰酒店, 唔入得啊! 不過如果入得一定俾人"溶"咗!
我就無可能係度瞓啦.....
叫做睇完成條冰村就返去攞車食飯啦, 睇吓負10度, 雖然Tomamu黎講唔係好凍, 但我已經凍到無咩反應....
雖然知去新餐廳~Hal應該可以泊車在外, 但一來黑晒睇唔到條路, 二來想試吓從Tower行所謂的Sky Walk過去。 哦, 其實又咪好似以前由Tower行去森林餐廳咁! Hal 以前係Alpha Hotel的lobby, 我08年夏天就係在這詢問參觀水之教堂的事, 記得係好大的lobby但又無咩人住, 改咗做餐廳真係無咁嘥....
食物好似同森林餐廳差不多, 影咗一些我覺得係是日精選的, 燒牛扒好"林"幾好味, 新鮮北寄貝飯要encore但無入面一"pat"白色"鼻涕會好好多, 鮮茄茶碗蒸有點奇怪但都ok, 蟹湯好清甜而且好快無晒, 呢碟剌身沙律好新鮮但份量少又唔好意思攞好多轉, 啡色一粒粒係豉油啫哩, 好得意又好味。 大少遇到趣事一則: 話說牛扒係每人一次限攞一塊, 有個大隻鬼佬話要兩塊, 個廚師堅持只可一塊, 就係咁, one...; two...; one...; two....對峙好耐, 大少行開睇唔到誰勝誰負 
除咗有小朋友好鍾意的朱古力噴泉之外, 有這款算係精緻嘅啫哩, 雪糕就一般...
睇住時間食完飯要去參觀水之教會同冰之教會9:00pm-9:30pm咋! 所有人都在Hal門外等導賞員出現, 我們行遠少少避一避人群, 就係咁o岩導賞小姐就站在旁, 由於佢無用咪, 佢開始帶團都無咩人跟住佢, 我哋就緊係趁其他人仲未知行先啦....
好彩行快一班電梯, 影咗幾張無咩人/人影的相, 人潮就殺到, 於是我走去問導賞小姐佢是否都會帶我哋去冰之教會, 她說不會帶只指示我們點行去, 於是行先啦....
去到已有幾個日本人影緊相, 但影完又唔行開, 我又怕人群又殺到, 好心急有些忟, 又係好難影呀....
都幾靚同特別, 可惜不能靜心欣賞又要徹退啦....
其實都預咗會係咁, 但當在現場時真係會好唔放鬆。 係時候返房休息, 在1樓電梯位對着的通道有咁嘅裝飾, 我初初以為有人結婚, 但睇真d牆的兩旁又係用紙花砌了"迎春"兩個字, 好'娘"啊! 所以無影 
尖頂走廊有少少教堂feel! 返到房玩啦)))), 唔係呀, 係瞓啦)))))
豐富的一天又完了! 感恩! 
呢種房真係細少少喎, 不過以前都係經酒店訂房, 所以先知有d房景觀係好少少.......
回覆刪除[版主回覆02/24/2011 14:11:00]但好處係行去各玩點比較近, 好方便
(Empty)
回覆刪除[版主回覆02/24/2011 14:11:00]多謝鼓勵!
咦...你哋住頂樓呀? 個屋頂係三角形嘅?
回覆刪除我都好喜歡佢個位置，最緊要係冇旅行團住。
但係我攞牛扒時無話一人只可攞一塊喎，我見有人一次攞4、5塊，我一次都攞咗3塊，一人一塊嘛。北寄貝飯入面一pat pat好似鼻涕可以叫佢唔好放，因為我一向唔鍾意食，所以我叫佢唔好放。刺身其實可以同佢講話要2人前或3人前，甚至4、5人前都得，咁佢就會俾2人份量或3人份量你，咁你就可以食多D又唔駛行咁多轉。
[版主回覆02/24/2011 15:11:00]那, 正常應該係咁, 無理由配給咁奇怪, 不過可能我們那晚人多, 多到要開偏廳, 我們就係入咗去坐, 所以要控制吓啩 北寄貝我都有提出要求, 但佢話唔得咁咪算囉!
係呀3樓, 同一座住的人都係去滑雪的日本人同外國人, 係呢度見得最多鬼啦....
哎呀，完全唔知有暖水池！
回覆刪除好明顯你果日住客多, 人多人小感覺好唔同! 我果日ice village無咩人, 鍾意點影就點影. 牛扒任拎, 刺身多幾片!鼻涕可以唔要架, 雖然我打交义手勢時廚師咀妙妙, 似乎話我唔識食, 但果pat野勁難食, 好耐之前中過招, 一世都認得佢. 話說我家小姐拎碗飯俾廚師整碗三文魚飯, 廚師送佢一個冏樣添呀
[版主回覆02/24/2011 20:40:00]因為多數人都掛住沖浪咪無留意到囉! 你實會去多次, 下次玩啦! 食個雲海早餐呀! 日本人, 你可以話佢哋有原則, 但好多時我就覺得係"死咕咕" 唔識轉彎! 有時都俾佢哋吹到"啤"一聲! 下次佢冏你時你又冏番佢, 睇邊個冏d囉
Zason+2T : 呢間 "Tomamu" 好多 Blog友捧場 , D相睇到熟晒 .
回覆刪除不過真係好正 , 係呢 ~ 多唔多港人入住架 ? 我最怕好似返香港咁 .
Bye Bye !
[版主回覆02/24/2011 23:16:00]農曆年去想唔多都唔得, 點止好似係香港, 有時以為自己係中國, 有時又以為在台灣, 如果唔駛就小朋友假期或雪祭, 最好農曆年前去, 所有中國人都未放年假就最好啦! Villa Sport算少香港人啦, 老外多!
哈哈, 等食個雲海早餐啦 . . . 好正架 不過, 你地今次都好唔錯呀, 系人多咗DD咁啦
回覆刪除[版主回覆02/27/2011 21:36:00]食過喇! 冬, 夏各去一次, 應該唔會咁快再去lu!
間房1晚由原來3萬幾減至萬八日元, 嘩! 相差幾大喎. 酒店肯比你哋改plan都OK呀.
回覆刪除[版主回覆03/03/2011 20:18:00]唔係酒店俾, 我在Jalan取消舊的訂房再訂之嘛! 差咁遠改硬啦