兩點幾先到小樽, 大少想再去三角市場。 上次幫襯的食店無位, 又試吓另一家, 有位坐底大少就帶妹妹去揀蟹, 我又係例牌, 海螺吖唔該....
呢個約千鬆yen, 比"開"的大和更新鮮...
三色飯主要係要小姐o岩食的, 家姐仔食熟野的, 蟹柳+湯, 海膽, 甜蝦大人食....
呢個係妹妹的, 她的最愛一次過食.....
其實之前食咗蛋糕都唔太餓, 加多一隻蟹就夠了, 但呢隻蟹身全部都係膏同蟹籽咁滯, 只有腳係肉, 唔可以食太多膏啊, 所以有少少唔抵的感覺, 不過店主好好人, 主動俾隻活蟹我哋拎住影相, 又送小樽postcard....
食飽行去小樽駅睇吓有無咩資料攞, 就見到雪燈之路嘅模型....
本來想行舊手宮線會場, 但妹妹話想去買公仔先, 反正未有燈睇, 去咗堺町通先啦, 行吓,睇吓又滿足咗妹妹, 咁又大半個鐘....
音樂盒館門外的兔兔Kitty, 好得意架.....
兔年比較多兔的裝飾.....
等過馬路時見到, 快影下來所以則邊好多路人甲乙丙, 剪走晒....
大家去過小樽都知由十字路口去六花亭的距離, 好近啫, 但天色好快已轉成暗灰, 嗱! 我無在Le Tao外試食朱古力用咗d時間呀! 有燈的雪人仔好靚....
佢兩個真係唔放過任何一個玩雪嘅機會.....
沿堺町通行去運河, 好多店都關了門, 天又黑齊, 此時開始落大雪, 急步去到運河, 嘩! 真係好多人呀, 排隊影心心都好長龍, 但呢個係我最想影全家福個位, 點都排, 真係好難有半秒影到個心心無人....
影心心相時, 遊人就發揮互相幫助的精神, 後面的幫前面的揸機, 如你後面的人識影相, 你就好彩地有張好的紀念品, 我見有的太太幫人影, 按完快門隻手一齊郁, 張相點大家都估到, 好彩幫我們的一睇就知"掂"呀! 影完全家福, 指定動作二, 雪景運河, 好難先迫到個角落位咋....
開始迫向雪燈之路, 真係好迫而且好多人擔遮, 條路好難行...
一支一支的小燈柱....
地上有心形的雪塊裝飾, 家姐仔見到路邊有一塊跌咗落o黎以為可以攞好想要一塊, 大少解釋佢知點解唔得, 佢就乖乖地幫手放回心心群中....算你啦!
仲有星星形添呀.....
我最鍾意花花雪燈....
小兔子談談情, 賞雪燈....
雪越落越大, 連眼都唔可以睜開咁, 我本來想唔理咁多, 等咗咁耐又咁遠o黎到, 迫都迫埋落去, 點知突然間妹妹好大聲又好嬲咁叫住我 : 媽咪! 咁大雪你仲行???你傻夠未呀! 佢想喊咁, 我就真係當堂傻咗幾秒, 醒返之後都覺得咁大雪又多人, 小朋友真係咩都睇唔到好辛苦, 問心真係有點傻, 於是放棄啦, 返札幌吧! 看! 真係好大雪啊....
由於我們泊了車在銀之鐘外, 都好遠吓, 於是我同小姐們在青山洋服店借用洗手間再等大少接。 初時店員都好好, 但越黎越多人入去避雪同借洗手間, 他們的面口黑晒呀! 
返到札幌，我的"心火燥"o黎料啦! 話說回札幌路上, 醒起本來想在小樽的"牛角"食燒肉, 發瘟無咗件事! 返到札幌都7點多, 於是諗住去酒店街口的"牛乃家"食(都係燒肉店), 點知又係無位, 要8點先有。 咁唯有上房放底野再諗吓食咩啦, 點知上到房兩位小姐唔肯再出去食晚餐, 話好攰, 要食杯麵同腐皮壽司! 唔係化, 我好唔想喎, 而且早兩日在長途車的午餐已經係咁喇喎, 落酒店餐廳食都好吖, 氹好耐點都唔肯, 於是我就"把幾火"拎起個袋, 一手拉走大少: 你哋唔食就算, 我哋去食, 你哋自己留係房啦! 唔係講笑, 我同大少真係自己落去狸小路, 酒店對面食博多拉麵, 食完再去7仔買些東西給她們, 大半個鐘返上房, 我問家姐覺得點, 佢話好驚妹妹又喊, 知道扭計唔o岩.....
今次呢個教訓方法可能激咗d, 我一路行一路有點擔心, 不過真係好想佢哋知道唔可以成日都要大人遷就, 大人都攰, 小朋友要體諒...我係衡量過小朋友的性格同安全先咁做, 其他人唔好呀! 
唔太滿足的一天, 不過另類充實, 嘻嘻!.....
嘩, 你好大膽呀! 我可能會派一個出去買嘢食, 一個留係房睇住佢哋, 真係唔放心呀!
回覆刪除嘩, 你好大膽呀! 我可能會派一個出去買嘢食, 一個留係房睇住佢哋, 真係唔放心呀!
回覆刪除[版主回覆02/28/2011 14:52:00]依家諗番都覺幾危險, 萬一有咩事, 如地震....真係 佢哋一定唔會亂開門同自己出去揾我哋! 我又真係衝動咗d, 在香港我一定唔會獨留兒童在家, 佢哋就係睇死我唔會留底她們囉! 點知我今次亦係第一次咁狠, 真係估我唔到!
我2月7號嗰晚响小樽, D雪都係落得好大, D雪打落塊面度真係幾痛吓架
回覆刪除你地兩個"出走"嗰陣佢地無喊咩??俾著係我對姨甥仔女, 佢地一定喊到拆天
[版主回覆02/28/2011 15:02:00]唔止痛, 直情頭都唔可以抬起, 因d雪直標入鼻, 所以勉強睇落去兩個小朋友會好辛苦, 淨係睇到大人d pat pat.... 家姐就冷靜些還會安慰同照顧妹妹, 只係好驚, 而妹妹就有喊! 後來方訪問她們, 雖然係好驚, 但佢哋好有信心爸爸媽媽係會返黎唔會唔要佢哋喎, 不過呢個教訓好深刻
我可能都會似你咁做, 但就唔去食飯, 系樓下lobby坐五分鐘再上返去, 佢地應該會跟出去食飯. 我好少有呢個問題, 就算佢瞓左覺, 一講食就精神
回覆刪除[版主回覆02/28/2011 18:05:00]其實我哋本來係落去狸小路睇吓有無咩買上去俾佢哋食, 但好多都無外賣, 先至快速食完再去7仔買食物咋! 佢兩隻唔鍾意出街食飯, 就算去旅行都成日話買野返房食 好多時都俾佢哋吹到"啤啤"聲
估唔到你咁懇心喎, 換轉我可能都會咁
回覆刪除[版主回覆02/28/2011 20:27:00]佢哋係度嘈時, 我正在做網上登機, 大少氹佢哋去食飯, 兩個 o靚妹"大"我哋唔會留底她們, 我其實全都聽到, 當我完成手續, 我企起身就行動...問你哋怕未!
Zason+2T : Wow ~ 乜玩到咁激呀 ? 呢種境界 , 我永遠都難達呀 .
回覆刪除Bye Bye !
[版主回覆03/01/2011 21:24:00]man wai: 就係唔係玩先咁激 呢方面嘅境界死好多細胞架....
咁你地係三角市場試戈間店叫咩名呀??(值得一試嗎?)
回覆刪除[版主回覆03/01/2011 21:31:00]三角市場好值得去試, 其實邊間分別都唔大, 我今次去係近街尾的, 無影底係咩名啊!
嘿, 真系為難做父母嘅 . . . 你呢個問題, 我今次呢團都有 . . . 小團友可能已經唔系第一次出發, 知道父母唔會系外遊時太嚴 . . . 所以, 好多時會將一D平常唔做嘅, 唔扭嘅都會出晒嚟 . . . 其實, 都會系因為佢地唔明白D燈有mug 咁好影, 就好似我地唔明白D雪有mug 咁好玩一樣 . . . 下次啦, 可能大家比多d大家各自活動嘅時間會好d . . .
回覆刪除[版主回覆03/01/2011 21:37:00]..."因為佢地唔明白D燈有mug 咁好影, 就好似我地唔明白D雪有mug 咁好玩一樣", 全中! 我一路行, 佢哋就一路問: 有咩好睇呀? 有咩好影呀? 好似唸咒語咁....
小樽嘅雪燈之路好靚. 好想去睇呀! 攪到我心痕痕.
回覆刪除我家小姐們都有這個毛病 - 經常只想自己(要大人遷就). 我老公大多數會就範(男人怕女人喊). 而我唔想佢哋有"公主病"有時會企硬, 等佢知道細路可以表達意見, 但最終係大人決定. 假若當時狀況換轉係我同老公, 都會一手拿手袋就出房間到電梯大堂扮等電梯, 因我家2位小姐較"驚青"一定會追出嚟搵番我哋.
[版主回覆03/03/2011 20:30:00]睇我d相都都知我失敗而回都吸引到你, 坦坦白白係你想去喎, 嗱! 你氹你老公去時唔好拉我落水呀, 唔關我事架我無引你呀! "公主病"~ 我都好驚, 但有時自己唔覺唔覺都有份整病佢哋, 所以大人都要警惕, 現在我唔會成日"呵"住佢哋同太就佢哋!